Apple bu dəfə rəqiblərindən daha tez davranaraq iPhone seriyası üçün ekranaltı kamera və Face ID sensorlarını patentləşdirib. Belə ki, sosial şəbəkədə Apple şirkətinin yeni patent ərizəsi ortaya çıxıb. Ortaya çıxan bu ərizədə isə kamera və Face ID sensorlarının ekranın altından necə yerləşdiriləcəyi əks olunub. Görünən odur ki, Apple yaxın gələcəkdə iPhone seriyasını yenidən dizayn edəcək. Artıq bir çox istifadəçinin xəyalına çevrilən şəffaf ekranlar yaxındadır.
Patent mətninə əsasən deyə bilərik ki, Apple matrisin “pikselsiz” sahələrindən istifadə edərək işığın ekranın kamerasına daxil olmasına icazə vermək istəyir. Təbii ki, bunun baş verməsi üçün ekran panelinin müəyyən hissələrində ppi dəyəri kifayət qədər azalmalıdır. Hələlik bu texnologiyanın necə işləyəcəyi tam bəlli olmasa da, sensorların ayrı-ayrılıqda işə düşəcəyi gözlənilir. Maraqlısı budur ki, köməkçi sensorlar arasında yaxınlıq, işıq və barmaq izi skaneri də yer alır. Apple nəinki, ekranaltı kamera həm də ekranaltı barmaq izi dizaynına keçid edə bilər.
Xatırladaq ki. bir çox insan iPhone 14 və iPhone 15 seriyasının ekranaltı gizli barmaq izi skanerinə sahib olacağını gözləyirdi. Lakin Apple bu mövzuda istifadəçilərini məyus etmişdi. İndi isə onların xəyalını reallaşdıra bilmək üçün bir addım ataraq yeni texnologiyasını patentləşdirib. Analitiklərə görə ekranaltı kamera sensoruna sahib olan ilk iPhone gələn il elan edilə bilər. Yəni iPhone 16 Pro seriyası bizləri möhtəşəm yeniliklərlə qarşılaya bilər.
