Apple ötən aylarda yeni iPhone 15 seriyası ilə çox mübahisə mövzusuna çevrilmişdi. Belə ki, bir çox insan texnologiya nəhənginin demək olar ki, heç bir dəyişiklik etmədiyini, bir çoxu isə yeni seriyanın yeni xüsusiyyətlərə və performansa sahib olduğunu bildirirdi. Qeyd edək ki, Apple yeni iPhone 15 Pro və Pro Max modellərində 3x və 5x olmaqla optik zoom texnologiyasına sahib telefoto kameraya sahib olmuşdu. İndi isə ortaya çıxan iddialara görə Apple yeni smartfonlarında 10x optik zoom texnologiyasından istifadə edən telefoto kamerasına keçid edə bilər.
Ümumiyyətlə bu il iPhone seriyasındakı ən böyük yenilik məhz Titan çərçivəli Pro seriyasının təqdim edilməsi və telefoto kamera tərəfindəki təkmilləşdirmələr idi. Belə ki, texnologiya nəhəngi ilk dəfə olaraq iPhone 15 Pro Max modelində 5x optik zoom-a malik telefoto kamerasından istifadə etmişdi. Bu isə onu göstərir ki, Apple şirkəti də artıq zoom tərəfində müəyyən təkmilləşdirmələr etmək niyyətindədir. Məlumata görə, Apple hazırda tetraprizma modulunu tədarük edən LG Innotek şirkətinin bəzi mübahisələrə görə Luxshare-nin törəmə şirkəti olan İKT ilə əvəz edəcək.
Hələlik bununla bağlı təfərrüatlar məlum olmasa da yeni nəsil tetraprizma modulunun Apple şirkətinə 10x optik zoom texnologiyasından istifadə etməyə imkan verəcəyi iddia olunur. Hələlik yeni texnologiyadan hansı iPhone seriyasında istifadə ediləcəyi tam dəqiq məlum deyil. Lakin analitiklərə görə bu texnologiya hələ iPhone 16 seriyasında bizlərə təklif edilməyəcək. Buna görə də 10x optik zoom bizə gələcək iPhone 17 seriyasında hətta iPhone 17 Pro Max modelində təqdim edilə bilər. Xatırladaq ki, Samsung artıq Galaxy S23 seriyasında bu texnologiyadan istifadə etsə də burada telefoto kamerası tetraprizma deyil, periskop modulu üzərində qurulub.
