Dünyanın ən məşhur mesajlaşma platforması olan WhatsApp qeyri-adi yenilik edərək video konfranslarında ekran paylaşımı xüsusiyyəti təklif edir. Artıq video zənglər zamanı smartfon və ya kompüterinizin ekranını dostlarınızla paylaşmaq mümkün olacaq. Ümumiyyətlə WhatsApp daim istifadəçilər üçün yeniliklər təqdim edir. Yeni ekran paylaşımı funksiyasının da uzunmüddətdir insayderlər tərəfindən platformaya əlavə ediləcəyi iddia olunurdu. Nəhayət WhatsApp insayderlərin iddiasını reallaşdırdı.
Qeyd edək ki, ötən günlərdə tətbiqə ani video göndərmə funksiyası də əlavə edilmişdi. İndi isə WhatsApp platformasındakı video konfranslarda ekran paylaşımı mümkün olacaq. Yeni funksiya müxtəlif regionlar üçün müxtəlif vaxtlarda təqdim ediləcək. Mərhələli şəkildə bütün WhatsApp istifadəçiləri yeni funksiyanı əldə edəcək. Uzunmüddət Zoom, Google Meet və Microsoft Teams kimi platformalarda olan bu xüsusiyyət artıq məşhur mesajlaşma tətbiqinə də əlavə ediləcək. Bundan əvvəl WhatsApp video zənglər üçün istifadəçilərin sayını 8-ə çatdırmışdı.
Ümumiyyətlə WhatsApp bildirir ki, səsli mesajlar istifadəçilərin səsini sürətli və təhlükəsiz yol ilə təqdim edərək ünsiyyət tərzini dəyişib. Ani video isə artıq bu ünsiyyəti daha fərqli səviyyəyə çatdırıb. Artıq istifadəçilər söhbət pəncərəsindən ayrılmadan 60 saniyəlik video göndərə bilir. Bu xüsusiyyət əsasən ad günü təbriki, zarafat və ya digər məqsədlər ilə istifadə oluna bilər. Lakin yeni ekran paylaşımı funksiyası istifadəçilərin video konfranslarda daha rahat müzakirə aparmasına imkan yaradır. Şübhəsiz Meta WhatsApp platformasına əlavə edilən bu yeniliyi gələcəkdə digər platformalarına da əlavə edəcək.
