Meta şirkətinin mesajlaşma platforması olan WhatsApp 5 ölkədə yeni biznes rəhbəri funksiyasını istifadəyə verib. 2018-ci ilin yanvarında təqdim olunmuş WhatsApp Business tətbiqi hazırda dünyanın bir çox ölkəsində aktiv olaraq istifadə olunur. Bu tətbiqə gələn yenilik vasitəsi ilə sahibkarlar müştərilər ilə rahatlıqla əlaqə saxlaya, müştərilər isə istədikləri satıcını rahatlıqla tapıb məhsulu sifariş edə bilərlər. Qeyd edək ki, WhatsApp-ın yeni funksiyası istifadəyə verilməmişdən öncə Braziliyada sınaqdan keçirilmişdi. Həmçinin yeni funksiya qeyd etdiyimiz 5 ölkədə həm Android, həm də iOS cihazlarda (Braziliya istisna olmaqla) mövcuddur.
Yeni “Biznes Rəhbəri” funksiyası hansı yenilikləri gətirir?
İlkin olaraq 5 ölkədə istifadəyə verilən Biznes Rəhbəri funksiyası istifadəçilərə biznes kateqoriyalarını təsnifləşdirməyə imkan verəcək. Belə ki, artıq WhatsApp Business tətbiqində qeydiyyatdan keçmiş şirkətləri istifadəçilər birbaşa adlarını yazaraq tapa biləcək. Meta şirkətinin baş direktrou Mark Zukerberq bildirib ki, bu funksiya istifadəçilərə biznes araşdırması apararkən və həmin biznesdən məhsul alarkən daha rahat istifadə təklif edəcək.
Belə ki, xüsusiyyətin ilkin mərhələdə aktiv olduğu ölkələrə Braziliya, Böyük Britaniya, İndoneziya, Meksika və Kolumbiya aiddir. Qeyd edək ki, hal-hazırda 120 milyon aktiv istifadəçisi olan Braziliya, Hindistandan sonra 2-ci ən çox WhatsApp istifadəçisi olan ölkədir. Lakin buna baxmayaraq şirkət bu ölkədə yeni Biznes Rəhbəri funksiyasını sadəcə Android cihazlarında istifadəyə verib. Hələlik bu funksiyanın ölkəmizə nə zaman gələcəyi barədə məlumat yoxdur. Lakin WhatsApp bu funksiyanı bütün dünyada daha çox biznesə çatdırmağı planlaşdırır.
