Texnologiya və təhlükəsizlik siyasətləri yenidən ABŞ-da müzakirə mövzusuna çevrilib. Dünyanın ən böyük çip istehsalçılarından biri olan Intel-in rəhbərliyi siyasi bəyanatların diqqət mərkəzində olub. Şirkətin baş direktoru ilə bağlı iddialar ictimaiyyətdə geniş əks-səda doğurub. Beləliklə, ABŞ prezidenti Donald Trump son dövrlərdə artıq müflisləşməyə doğru addımlayan Intel şirkətinin CEO-nu istefaya çağırıb.
Donald Trump Intel şirkətinin baş direktoru Lip-Bu Tanın istefaya getməsini istədiyini açıqlayıb. O, bu çağırışına səbəb kimi Çin texnologiya şirkətlərinə keçmiş sərmayələri olduğunu bildirib. Donald Trump Truth Social-da etdiyi paylaşımda Lip-Bu Tanın maraq toqquşması olduğunu ifadə edərək, “Bu problemin başqa həlli yoxdur” deyərək, Tanın dərhal istefasını tələb edib. Bu bəyanat senator Tom Kottonun Intel idarə heyətinə verdiyi təhlükəsizliklə bağlı suallardan sonra gəlib. Xatırladaq ki, Lip-Bu Tan mart ayında Intel-in rəhbəri vəzifəsini tutmuşdu. Vəzifəyə gəlməzdən əvvəl onun Çində yerləşən 600-dən çox texnologiya şirkətinə sərmayə qoyduğu iddia edilirdi. Bu şirkətlərdən bəzilərinin Çin ordusu ilə əlaqəsi olduğu iddia edilirdi. Ancaq Tanın bu investisiyaların nə qədərini tərk etdiyi bəlli deyil.
Maraqlısı budur ki, intel öz bəyanatında həm Tan, həm də Intel-in ABŞ-ın milli təhlükəsizliyinə sadiqliyini vurğulayıb. O, həmçinin müdafiə sənayesindəki rollarının məsuliyyətini dərk etdiklərini bildirdi. Trampın açıqlaması Intel-in hazırkı rəhbərliyinə təzyiqi artırıb. Şirkətin yaxın günlərdə yeni açıqlama verəcəyi gözlənilir.
