Tesla tərəfindən hər il keçirilən Investor Day tədbiri gecikməli də olsa başlayıb, 4 saatdan çox davam etdi. Elon Musk başda olmaqla bir çox şirkət təmsilçisinin, mühəndis və heyətin çıxış etdiyi tədbir boyunca bir çox yeniliklərdən və “Master Plan 3” ilə bağlı detallardan bəhs edildi. Təməl olaraq Master Plan deyilən şey, şirkətin növbəti 6-7 il ərzində etməyi planlaşdırdığı tapşırıqları hədəf alır.
“Master Plan 3” barədə detallardan danışsaq, Tesla şirkəti 4 prioritet istiqaməti hədəf alır. Tədbirə görə şirkət elektromobillərə keçid etməyin sürətlənməsi, dünyanın mövcud elektrik şəbəkəsini yenilənə bilən enerji ilə gücləndirmək, gəmi və təyyarələrdə karbon emissiyasının miqdarını azaltmaq və ev, müəssisələri isitmək üçün ekoloji cəhətdən daha təmiz istilik nasoslarının quraşdırılması kimi ekositem layihələrinə doğru genişlənməyə başlayacaq.
Elektromobillər baxımından şirkət 2030-cu ilə qədər şirkət hər il 20 milyonluq satış ədədinə çatmaq istəyir. Lakin bunun üçün qarşıdakı illərdə hal-hazırda 7 ədəd olan model seriyasının hər birinin tamamlanıb satışa çıxarılması, üstəlik ən az biri münasib qiymətli olmaqla bir əlavə 3 fərqli model çeşidinə ehtiyac vardır.
Tesla Investor Day tədbirinin sonuna qədər bəzən yeni Tesla modeli barədə cümlələr işlədilsə də şirkət heç bir yeni məhsul təqdim etməyib. Yalnız Cyebertruck modelinin istehsalına bu ildən başlanacağı dəqiqləşib. Elon Musk qeyd edib ki, daha çox elektromobil istehsal etmək üçün hal-hazırda istehsal etdiyimiz elektromobillərin istehsalını daha qısa zaman ərzində tamamlamaq üzərində işləyirik. Eyni zamanda Tesla Model Y üzərində təsvir edilən nümunələrə görə də yeni elektromobillərin istehsalı yaxın gələcəkdə daha ucuz başa gəlməlidir. Hətta naməlum yeni Tesla modelinin də bu səbəbdən 50% daha ucuz qiymətə başa gələcəyi və 40% daha təmiz metodlarla istehsal ediləcəyi bildirilib.
Şirkət eyni zamanda yaxın 2 il ərzində Tesla Model 3 və Tesla Model Y modellərində eksteryer, interyer daxil yeniləyəcəyini bildirib. Ümumi dizayn xəttində dəyişikliklər olub-olmayacağı naməlumdur, lakin Çindəki istehsal xətti artıq yenilənəcək Tesla Model 3 və Tesla Model Y üçün hazırlıqlara başlayıb.
Tesla şirkətinin 4 saatlıq Tesla Investor Day tədbiri boyunca əsas əldə etdiyimiz nəticə isə qiymətlərin çətinliklə də olsa azaldılacağı ilə bağlıdır. Çünki, verilən suallara gələn cavablar xüsusilə tələbin daim çox olduğu, başlıca problemin qiymətlə bağlı yaşandığı ilə bağlı olub. Bu gün istehsaldan çıxan elektromobillərin az qala hər biri hansısa müştərinindir. Lakin şirkət daha çox elektromobil istehsal edib, çeşidliliyi qiymət azaldaraq çoxaltmaq istəyir.
Eyni zamanda şirkət Meksikada da yeni bir Gigafactory inşa edəcək. Bu Gigafactory isə Elon Musk dediyinə görə digər bütün fabriklərin istehsalını dəstəkləyəcək potensialda olacaq. İstehsal ədədini artırmaq planında vacib rollardan 2030-cu ilə qədər Meksikadakı bu fabrikin üzərinə düşəcək.
Şirkət həmçinin, nadir torpaq elementlərinin də istifadəsini azaltmaqla bağlı tədqiqatlar aparır. Yəni, qısaca loru dildə desək şirkət “materialdan kəsib qiymətləri necəsə aşağı salmağı özünə məqsəd qoyur.” Məsələn, elektromobilin maqnit mühərrikində nadir torpaq materiallarından istifadənin ləğv olunması mümkün olur. Heç bir performans itkisi olmadan güc aqreqatlarında 75% daha az silikon-karbid istifadəsi yaxın gələcək üçün şirkətin edəcəyi bir şeydir. Bütün bunlar isə istehsala sərf olunan vaxtı azaldan detallardır.
Təsəvvür edin ki, şirkət ilk milyon ədəd elektromobilini 12 ilə, ikinci milyonluğu 1 il 6 aya, üç və dördüncü milyonluğu 11 və uyğun olaraq 7 aydan qısa müddətdə tamamlayıb.
Ümumilikdə bu mövzular ətrafında dolanan Investor Day tədbirində, qısa epizodlar şəklində Optimus Robotunun başqa bir robotu hazırlaması, şarj texnologiyaları, Tesla avtopilot sistemləri və superkompüterləri ilə bağlı qeydlər oldu. Elon Musk isə elə Tesla ilə bağlı biraz qınaq obyektinə çevrildi. İnsanlara ən çox maraqlı olan yeni Tesla modeli göstərilmək əvəzinə, daha çox sıxıcı gələn detallar onsuzda 25 dəqiqə gec başlayan tədbirdə ağırlıq yaratdı. 4 saat sonunda həqiqətən heç bir yeni məhsul görməyən investorlar və xüsusilə Elon Musk-ın səhnədə olmadığı müddətdə Twitter üzərində tamamilə fərqli paylaşımlarda rəy yazması çoxlarının əsəbləşməsinə səbəb oldu. Hətta maraqlı bir detal var idi ki, tədbirin sonlarına doğru Tesla hissələri 5% dəyər itirdi.
