Bildiyimiz kimi, hazırda İsrail və Həmas arasında olan münaqişələr səbəbi ilə bir çox texnologiya nəhəngi müharibə məzmunlarına icazə vermir. Lakin Telegram CEO-su Pavel Durov bildirib ki, platformada müharibə məzmunlarına icazə veriləcək. Xatırladaq ki, Telegram şirkətinin ən böyük rəqiblərindən olan Meta, İsraillə HƏMAS arasındakı münaqişəyə görə həssas qərar verərək bu tip məzmunları qadağan edib.
Telegram şirkətinin baş icraçı direktoru, Pavel Durov açıqlamasında bildirib ki, “Bu həftənin əvvəlində Həmas Aşkelondakı mülki şəxsləri raket hücumlarından əvvəl bölgəni tərk etmələri barədə xəbərdar etmək üçün Telegramdan istifadə etdi. Kanalların bağlanması insanların həyatını xilas etməyə və ya daha çox həyatı təhlükəyə atmağa kömək edəcəkmi?”. Onun fikrincə platformada istifadəçilər digər sosial şəbəkələrdən fərqli olaraq alqoritm əsaslı məzmunlara deyil, yalnız abunə olduqları kanalların məzmunlarına nəzər salır. Məhz bu, digər platformalardan fərqli olaraq Telegramda təbliğatların baş verməsi ehtimalını aşağı salır.
Ümumiyyətlə, Telegram və WhatsApp arasında hər zaman mübarizə olub. Daha əvvəl də Telegram rəhbəri səs-küylü bəyanatlarla çıxış edərək, WhatsApp platformasını pisləmişdi. O cümlədən, Durov bu platformada təhlükəsizlik problemlərinin olduğunu bildirmişdi. “İstənilən mesajlaşma proqramından istifadə edin, amma WhatsApp-a yaxınlaşmayın” deyən Durov, burada Telegram-ı ön plana çıxarmağa çalışmadığını, 700 milyondan çox istifadəçisi olan Telegram-ın buna ehtiyac duymadığını da bildirmişdi. İndi isə Telegram müharibə məzmunlarına icazə verməklə əzəli rəqibindən önə keçməyə çalışır.
