Oyun sənayesinin ən nüfuzlu şirkətlərindən biri olan Steam sadəcə 336 nəfərlik işçi heyətinə sahib imiş. Qeyd edək ki, bundan əvvəl, şirkətin işçilərinin sayı və onların maaşları barədə heç bir məlumat yox idi. Yeni ortaya çıxan məlumatlara görə, nəhəng şirkətin minlərlə deyil sadəcə 336 nəfər işçisi var.
Kompüter oyunlarını almağı asanlaşdıran ilk və ən əhəmiyyətli platformalardan biri olan Steam, uzun illərdir oyun sənayesinə rəhbərlik edən adlardan biridir. Sərvətinə və böyük nüfuzuna baxmayaraq, indiyə qədər şirkət haqqında məlumatımız kifayət qədər məhdud idi. İndi isə məlum olub ki, Steam çox böyük nüfuzuna rəğmən 2021-ci ildə sadəcə 336 nəfərlik işçi heyətinə sahib olub. Müqayisə üçün qeyd edək ki, EA və Riot Games kimi şirkətlərdə minlərlə işçi çalışır. Steam üzərindəki bu gizlilik pərdəsini aradan qaldıran isə məhkəmə olub.
Qeyd edək ki, Wolfire, Steam-ə daha əvvəl antiinhisar iddiası qaldırmışdı və bu işlə bağlı məhkəməyə təqdim edilən bəzi sənədlər sızdırılmışdı. Sızdırılan faylların tədqiqi Steam haqqında bəzi suallara cavab verməyə də kömək edib. Bu məlumatlara şirkət tərəfindən edilən əmək haqqı ödənişləri kimi məlumatlar daxildir. 2003-cü ildən başlayan işçi məlumatları 2021-ci ilə qədər uzansa da, şirkətin 2011-ci ildən etibarən işçilərini admin, oyun, steam və hardware kateqoriyalarına ayırdığı ortaya çıxıb. 2021-ci ildə Admin kateqoriyasında ümumilikdə 35 işçiyə 158 milyon dollara yaxın, oyun kateqoriyasındakı 181 işçiyə isə 192 milyon 355 min dollar məbləğində ödəniş edilib. Bu rəqəmlər steam kateqoriyasında 79 nəfər üçün 76 milyon 446 min 633 dollar, hardware kateqoriyasında isə 41 nəfər üçün 17 milyon 706 min 376 dollar təşkil edib. Hələlik isə, Valve bu mövzuda heç bir açıqlama verməyib.
