2008-ci ildən fəaliyyətə başlayan Spotify, illərdir zərərlərini elan etdikdən sonra 2024-cü ildə ilk dəfə gəlirliliyə çatmağı bacarıb. Belə ki, dünyanın ən çox istifadə olunan musiqi platforması ünvanına sahib Spotify tarixdə ilk dəfə olaraq illik mənfəətini açıqlayıb. 2023-cü ildə 532 milyon zərər açıqlayan şirkət, keçən il 1,14 milyard avro gəlir əldə etdiyini açıqlayıb.
Qeyd edək ki, 2023-cü ildə 13,2 milyard avro gəlir əldə edən Spotify, 2024-cü ildə 18% artımla 15,6 milyard avro gəlir əldə edib. Ümumilikdə isə şirkətin ümumi aktiv istifadəçilərinin sayı 12% artaraq 675 milyona, Premium abunəçilərinin sayı isə 11% artaraq 263 milyona çatıb. Görünən odur ki, Spotify Premium abunələrinin qiymətini 11 ay ərzində iki dəfə artırsa da, abunəçilərinin sayını artırmağı bacarıb. Bilməyənlər üçün qeyd edək ki, Şirkət ABŞ-da Premium-un qiymətini 2023-cü ilin iyulunda ayda 9,99 dollardan 10,99 dollara, 2024-cü ilin iyununda isə 11,99 dollara qaldırıb.
Hazırda isə Azərbaycanda fərdi 4.99, tələbə 2.49, duo 6.49, Ailə 7.99 dollar qiymətinə təklif olunur. Ümumiyyətlə, Spotify ötən il ərzində musiqi xidmətini yeni süni intellekt dəstəkli çalğı siyahıları və audiokitab xüsusiyyətləri ilə təkmilləşdirib. Məhz bu yeniliklər səbəbindən ABŞ-da qiymətləri artıran Spotify istifadəçilərin gözünü süni intellektlə boyamağı bacarıb. Hazırda Spotify Deezer, YouTube Music ilə rəqib olsa da, ABŞ nəhəngi rəqiblərindən böyük fərqlə qabaqdadır. Bununla belə, Spotify hələ də çoxdandır vəd etdiyi itkisiz audio variantının nə vaxt istifadəyə verəcəyi ilə bağlı məlumat vermir.
