PlayStation oyun konsolları və televizorları ilə tanınan elektronika nəhəngi Sony Yaponiyanın ən dəyərli şirkətləri siyahısında ikinci yerə yüksəlib.
Qeyd edək ki, dünyaca məşhur avtomobil istehsalçısı olan Toyota Yaponiya şirkətləri arasında ən böyük kapitala malik şirkətdir. Belə ki, şirkətin bazar dəyəri 231,69 milyard dollar olaraq qiymətləndirilir. Sony isə 149.32 milyard dollarlıq göstərici ilə Toyota-dan bir addım geridə dayanaraq Yaponiyanın ikinci ən dəyərli şirkəti olub. Ümumiyyətlə isə üçüncü sırada Mitsubishi UFJ Financial dayanır. Onun göstəricisi isə Sony-ə daha yaxın yəni 146.46 milyard dollardır.
Bundan əlavə, İlk 10-luğa elektronika və tikinti texnikası nəhəngi Hitachi də daxildir. Switch əl konsolu və bu konsol üçün oyunların satışından milyardlarla dollar qazanan Nintendo 89,78 milyard dollar kapitalla yalnız onuncu yerdədir. Sony-nin bazar dəyərinin artımı xüsusilə oyun və şəbəkə xidmətləri bölməsində göstərdiyi əla performansa əsaslanır. Sony-nin 2024-cü ilin 3-cü rübü üzrə qazanc hesabatı göstərir ki, Sony-nin oyun biznesi əhəmiyyətli gəlir artımı təmin edib. Habelə, bütün bunlar şirkətin ümumi bazar dəyərinin yüksəlməsində əsas amil oynayıb. Qeyd edək ki, şirkət hazırda Playstation 5 oyun konsollarından gəlir qazanmağa davam edir. Bununla belə, Sony yeni Playstation 6 konsolunu bir neçə il sonra təqdim edə bilmək üçün artıq hazırlıqlara başlayıb.
