Ötən günlərdə yeni PS5 Pro modelini bizlərə təqdim edən Sony şirkəti gözlədiyi marağı yarada bilmədiyi üçün yeni cihazını kompüterlər ilə müqayisə etmək qərarına gəlib. Belə ki, PlayStation 5 Pro-nun elanından sonra oyunçular arasında konsol almaq üçün 700 dollar ödəmək əvəzinə eyni pula güclü kompüter almağın daha məntiqli ola biləcəyi ilə bağlı müzakirələr aparılmışdı. İstifadəçilər bu yolla daha yaxşı qrafika ilə oyunlar oynaya biləcəklərini və oyunların daha sərfəli olacağını müdafiə edirdilər.
PlayStation prezidenti Hideaki Nishino bu məsələ ilə bağlı öz fikirlərini oyun həvəskarlarına bildirib. Təcrübəli menecer Yaponiyanın Nikkei mətbuat təşkilatına müsahibəsində konsolların istifadəsinin rahatlığına diqqət çəkib. O qeyd edib ki, mobil oyunlar tez-tez reklamlarla qarşılaşır və fərdi kompüterlər kompleks düzəlişlər tələb edir. Nishino-ya görə, PlayStation qutudan çıxarkən istifadəyə hazır olduğu üçün istifadəçilərin mürəkkəb parametrlərlə məşğul olmasına ehtiyac yoxdur. Cihaz işə salındıqdan sonra siz dərhal oyunları oynamağa başlaya bilərsiniz. PlayStation-ın müdiri həmçinin Sony-nin oyun mağazası PlayStation Store-un istehlakçılar üçün əhəmiyyətli bir müsbət tərəf olduğuna da diqqət çəkib. Onun sözlərinə görə PlayStation Store daha intuitiv təcrübə təqdim edir və oyunlar asan əldə edilə bilən şəkildə təqdim olunur.
Xatırladaq ki, PS5 Pro təqdim edilərkən şüa izləmə və yüksək performans tərəflərində sələfindən daha üstün olduğu vurğulanmışdı. Belə ki, PS5 Pro çipindəki qrafik blokunun emal vahidləri 67 faiz, RAM performansı da 28 faiz artırılıb. Habelə render performansında 45 faiz artım əldə edilib. Konsol 8 bitlik emalda 300 TOPS tutumlu xüsusi maşın öyrənmə arxitekturasına malik olub. 7 Noyabr tarixindən etibarən satışa çıxarılması gözlənilən cihazın başlanğıc qiyməti 700 dollar olaraq təyin edilib.
