Bildiyimiz kimi, Qualcomm brendi indi bir neçə ay sonra təqdim edəcəyi Snapdragon 8 Gen 4 üzərində işləyir. Belə ki, texnologiya nəhənginin yeni flaqman çipset ilə böyük bir keçidə hazırlaşdığı düşünülür. Lakin, yeni ortaya çıxan məlumata görə Snapdragon 8 Gen 4 ilə flaqman smartfonların qiyməti gözləniləndən daha çox ola bilər.
Oktyabr ayında buraxılması gözlənilən prosessor, xüsusi Orion nüvələri ilə daxili CPU dizaynlarına sahib olacaq. Bununla belə, performans cəhətdən sələflərini ötməsi gözlənilən Snapdragon 8 Gen 4 çipsetinin qiyməti smartfon istehsalçılarına baha başa gələcək. Apple-ın M seriyalı prosessorları TSMC-nin qabaqcıl 3nm texnologiyasından istifadə edir. İddiaya görə, Qualcomm-un yaxın aylarda bazara çıxaracağı Snapdraggon 8 Gen 4 prosessoru da 3nm texnologiyasından (N3E) istifadə edəcək. Beləliklə, Qualcomm ilk dəfə çipsetləri üçün 3nm texnologiyasından istifadə edəcək.
Çipsetin 3nm texnologiyasına əsaslanması onun daha yaxşı performans və səmərəlilik təklif etməsinə səbəb olsa da, istehsal xərcini artıracaq. Digital Chat Station mənbəsinin verdiyi məlumata görə, Snapdragon 8 Gen 4-ün istehsal qiymətinin artdığı bildirilir. Bu qiymət artımının smartfon bazarına ciddi təsir etdiyi görünür. Beləliklə, daha bahalı çipsetə görə smartfon istehsalçıları rəqabətədavamlı qiymətləri saxlamaq üçün cihazlarının ümumi konfiqurasiyalarını yenidən dizayn etməli ola bilər.
