Daha əvvəl də bildirmişdik ki, dünya bazarında çipset qiymətləri durmadan artır. Belə ki, artıq Snapdragon 8 Gen 3 çipsetinin qiyməti 200 dollara çatıb və sələfindən 25% daha bahadır. Ümumiyyətlə Qualcomm hər il təqdim etdiyi flaqman çipsetlərdə istifadəçilərə daha çox performans və sürət vəd edir. Habelə, texnologiya nəhəngləri də öz cihazlarını ən sürətli çipset ilə təmin etmək üçün məhz Qualcomm şirkətinə müraciət edir. Lakin görünən odur ki, Qualcomm büdcəni nəzərə almır və hər il çipsetinə daha çox funksiya əlavə edir.
Analitiklərin apardığı araşdırma nəticəsində məlum olub ki, Qualcomm şirkətinin flaqman Snapdragon 8 Gen 3 çipseti sələfindən 25% daha baha olaraq 200 dollar qiymətə sahibdir. Bu isə öz növbəsində bu il təqdim edilən smartfonların qiymətində də öz təsirini göstərir. Artıq texnologiya nəhəngləri öz flaqman smartfonlarını 100 dollar baha qiymətə təklif etməyə başlayıb. Bu qiymət artımı üçün isə biz onları günahlandıra bilmərik, çünki, bütün qiymət artımlarının əsas və başlıca səbəbi məhz Qualcomm şirkətinin büdcəni nəzərə almadan çipsetlərini müxtəlif funksiyalarla təchiz etməsidir.
Maraqlısı budur ki, 2016-cı ildə buraxılan Snapdragon 835 çipsetinin qiyməti sadəcə 42 dollar təşkil edib. Hər il artan qiymətlər nəticəsində isə 2024-cü ildə Snapdragon 8 Gen 3 çipsetinin qiyməti 200 dollar olub. ABŞ-da 1299 dollara satışa çıxarılan “Galaxy S24 Ultra”nın ötən illə müqayisədə 100 dollar bahalaşmasında çipsetin qiymətinin artmasının da rol oynadığı bildirilir. Bununla belə qiymətlərin daha da artacağı gözlənilir.
