Samsung şirkəti artıq litium-ion batareyalarından daha fərqli yeni batareya texnologiyası ilə smartfon sahəsinin gələcəyini dəyişə bilər. Ümumiyyətlə bu gün bazarda olan əksər smartfon litium-ion batareyalar ilə təchiz edilib. Bu batareyaların ətraf mühitə olan zərəri və təhlükəsizliyi sual altındadır. Belə ki, indiyə qədər bir çox smartfon bu batareyaların qızması və partlaması səbəbindən zərər görüb. Samsung şirkəti isə yeni həll yolu olaraq qatı halda olan batareyalar üzərində işləyir. Hələlik bu texnologiyanın detalları məlum deyil. Lakin insayderlər yeni texnologiyanın yaxın gələcəkdə tətbiq ediləcəyini bildirir.
Samsung şirkətinin qatı halda olan batareya texnologiyası, enerji sıxlığını təkmilləşdirərək, daha böyük tutumlu lakin az həcmli batareyalardır. Yeni texnologiyanın ən mühüm cəhəti təhlükəsiz olmasıdır. Belə ki, bu batareyalar yanğın riski daşımır və daha uzun batareya ömrü vəd edir. Ümumiyyətlə Samsung 10 ildən çoxdur ki, bu texnologiya üzərində çalışır. İnsayderlər bildirir ki, şirkətin yeni layihəsi son dövrlərdə möhtəşəm irəliləyiş qeydə alıb. Məhz bu səbəbdən də yeni texnologiyanın yaxın gələcəkdə flaqman smartfonlarda istifadə ediləcəyi gözlənilir.
Qeyd edək ki, Samsung brendi ilə yanaşı Xiaomi, QuantumScape kimi nəhənglər də qatı halda olan batareya texnologiyası üzərində işləyir. Bu şirkətlər arasında ən çox maraq doğuran məhz QuatumScape şirkətidir. Belə ki, şirkət hal-hazırda avtomobil sahəsinin nəhəng şirkətləri ilə sıx əlaqədədir və yeni texnologiyanın prototiplərindən istifadə etməyə başlayıb. Gələcəkdə daha çox şirkətin qatı halda olan batareya texnologiya üzərində çalışacağı gözlənilir.
