Cənubi Koreya mərkəzli texnologiya nəhəngi olan Samsung, bu dəfə də yenilikçi addım atmağı düşünür. Ümumiyyətlə, aparıcı yarımkeçirici istehsalçısı olan Samsung bu yaxınlarda ikinci nəsil 3nm prosesi üçün nomeklaturada əhəmiyyətli bir dəyişiklik etdiyini elan edib. Belə ki, Samsung şirkətinin bu dəyişikliyi ikinci nəsil 3nm prosesini 2nm olaraq adlandırmaqdır. Texnologiya nəhənginin bu addımı həm sənaye mütəxəssisləri, həm də həvəskarlar arasında mübahisə və marağın yaranmasına da səbəb olmuşdur.
Bildiyimiz kimi, Samsung yarımkeçirici sənayesində aparıcı mövqeyə sahibdir. Texnologiya nəhəngi artıq 3nm prosesindən istifadə edərək həm öz brendi, həm də digər brendlər üçün böyük həcmli tədarüklər edir. Bununla belə, Samsung istehsal prosesi təkmilləşdikcə əvvəlcə yeni ad olaraq ikinci nəsil 3nm prosesi düşündü. Ötən il isə şirkətin bu adı dəyişdirəcəyi ilə bağlı iddialar ortaya çıxmışdı. Nəhayət indi, Samsung ikinci nəsil 3nm istehsal prosesini 2nm adlandıracağına dair rəsmi açıqlama verib. Samsung-un fikrincə, bu proses bu ilin sonuna qədər kütləvi istehsala başlamalıdır.
Qeyd edək ki, yarımkeçirici sənayesini yaxından izləyən bir insayder bildirib ki, “Samsung Electronics-dən ikinci nəsil 3nm-ni 2nm-ə dəyişdirdikləri barədə bildiriş aldıq. Hətta Samsung rəsmi olaraq bu adı müqavilələrində də dəyişdirəcək”. Xatırladaq ki, 2022-ci il iyunun sonunda Samsung Electronics all-gate və ya GAA prosesinə əsaslanan 3 nanometrlik çipləri kütləvi istehsal edən dünyada ilk şirkət olmuşdu.
