Bildiyimiz kimi, Samsung uzun müddətdir ki, dünyanın ən böyük yarımkeçirici çip istehsalçısı olub, lakin indi texnologiya nəhəngi liderliyi itirib. Belə ki, Intel indi ən böyük yarımkeçirici çip istehsalçısıdır. Counterpoint Research-in paylaşdığı hesabata görə Samsung Electronics-in bu sənayedən əldə etdiyi gəlir 2022-ci ildəki 70.2 milyard dollardan ötən il 43.4 milyarrd dollara kimi enib. Samsung qabaqcıl çipləri üçün müştəri tapa bilməməsi səbəbindən gəlirlərində də 38% azalma yaşayıb.
Samsung brendinindən fərqli olaraq Intel 2023-cü ildə yarımkeçirici çip istehsalında liderdir. Intel şirkətinin yarımkeçirici sənayesindən 2022-ci ildə əldə etdiyi 59.8 milyard dollar 2023-cü ildə 50.5 milyard dollara qədər ensə də, şirkət gəlirlərində yalnız 15% azalma yaşayıb. Məhz bu vəziyyət də Samsung-u ötməyə kifayət edib. Qeyd edək ki, ötən il Nvidia şirkəti üçün yarımkeçirici çip sənayesi olduqca gəlirli olub. Belə ki, süni intlellekt və bulud serverləri üçün güclü GPU-lar istehsal edən şirkətin gəlirləri 2022-ci ildə 16.3 milyard dollar olsa da, ötən il 30.3 milyard dollara yüksəlib. Bu isə onu göstərir ki, şirkət 1 ildə gəlirlərini 86% artırmağı bacarıb.
Qeyd edək ki, analitiklər 2024-cü ildə keçən illə müqayisədə yaddaş çiplərinə tələbatın artacağını və yaddaş çiplərinin qiymətinin bahalaşacağını iddia edir. Məhz bu səbəbdən də Samsung istehsal etdiyi yarımkeçiricilər üçün rahatlıqla müştəri tapa bilər. Analitiklər düşünür ki, Samsung bu il yenidən liderliyi əlinə alacaq və Intel şirkətini ötəcək.
