EssilorLuxottica, Meta ilə ortaq şəkildə hazırlanan Ray-Ban Meta ağıllı eynəklərinin illik satış gəlirinin üç dəfə artdığını və satış rekordu qırdığını açıqlayıb. Şirkətin 2025-ci ilin birinci yarısı üçün maliyyə hesabatına görə, bu artım ümumi gəliri 14,02 milyard avroya (təxminən 16,25 milyard dollar) çatdırıb. Bu, ötən ilin eyni dövrü ilə müqayisədə 7,3 faiz artım deməkdir.
Şirkətin baş direktoru Françesko Milleri və baş direktor müavini Paul du Saillantın sözlərinə görə, süni intellekt, qabaqcıl sensor texnologiyaları və məlumatlara əsaslanan səhiyyə infrastrukturu birləşərək insanları gücləndirəcək və fərdi potensialı üzə çıxaracaq. Bu transformasiyada Ray-Ban Meta-nın kommersiya uğuru, Oakley Meta Performance AI eynəklərinin təqdimatı və Nuance Audio-nun həvəslə qəbul edilməsi şirkət üçün yalnız texnoloji irəliləyişlər kimi deyil, həm də daşınan hesablamalar dövrünün başlanğıcı kimi qiymətləndirilir. Bu məhsullar Meta ilə 2019-cu ildən bəri davam edən əməkdaşlığın real nəticələri arasındadır.
Qeyd edək ki, EssilorLuxottica, Ray-Ban və Oakley kimi brendlərin, həmçinin Vogue Eyewear və Persol kimi brendlərin sahibidir. İyun ayında CNBC-nin verdiyi məlumata görə, şirkət yaxın gələcəkdə Prada markalı ağıllı eynəklər buraxmağı planlaşdırır. Meta ilə uzunmüddətli ortaqlığını davam etdirən şirkət, sentyabr ayında yaxın onillikdə çox nəsil ağıllı eynəkləri inkişaf etdirməyə davam edəcəyini açıqlayıb.
