Dünyanın ən zəngin adamı olmaqla yanaşı, texnologiya dünyasında da aparıcı yerə sahib olan Elon Musk bu dəfə Neuralink şirkətinin uğuru ilə bağlı paylaşım edib. Belə ki, Elon-un sözlərinə görə Neuralink çipi insanlar üzərindəki ilk sınaqlarında uğurlu nəticə göstərib. Hətta Neuralink çipi olan ilk xəstə düşünərək siçan kursorunu hərəkət etdirə bilib. Bilməyənlər üçün qeyd edək ki, ki, Elon Musk tərəfindən qurulan Neuralink, uzun müddətdir ki, insan beynini kompüterlərə bağlayacaq innovativ infrastruktur yaratmaq üzərində çalışır.
Hətta Elon uzun müddət gedən danışıqlardan sonra nəhayət ötən aylarda insanların üzərində də sınaqların keçirməsinə icazə almışdı. İnsanları süni neyron şəbəkələri ilə kompüter, robot və ya digər elektron məhsulları idarə edə biləcək səviyyəyə çatdırmaq üçün çalışan şirkət, beyin/maşın əlaqəsi üçün “Link” adlı məhsuldan istifadə etməyi planlaşdırır. Link xüsusi hazırlanmış, çox həssas robotla insanın kəllə sümüyünə inteqrasiya olunur. Buradan beyin siqnallarını toplayan və onları digər elektron cihazlara ötürə bilən Link, Elon Musk tərəfindən həm də FitBit məhsuluna bənzədilir.
Elon bu yaxınlarda Neuralink beyin implantının ilk dəfə insana quraşdırıldığını elan etmişdi. Hətta Musk-ın sözlərinə görə prosesdə iştirak edən ilk şəxs sadəcə əməliyyatdan bir gün sonra sağalıb və sınaq müsbət nəticələr baxımından uğurlu olub. Ümumiyyətlə Musk-ın inkişaf etdirdiyi bu sistem xüsusi əlilliyi olan insanlar üçün çox faydalı olacaq.
