Son illərin ən böyük yeniliyi hesab olunan süni intellekt bir çox sahədə istifadə olunur və fayda verir. Lakin aparılan araşdırmalar göstərir ki, süni intellekt sadəcə müxtəlif sahələrə deyil milyarderlərə də fayda verir. Belə ki, Bloomberg mənbəsinin verdiyi məlumata görə, ötən il milyarderlərin sərvəti əsasən süni intellekt hesabına artıb. Ümumiyyətlə dünyanın ən varlı adamlarının bu il qazandıqları sərvət haradandır?
Texnologiya sahəsində əldə etdiyi əhəmiyyətli uğurlar məhz Nvidia şirkətinin qurucu ortağı olan Jensen Huang-ın sərvətinin əhəmiyyətli səviyyədə artması ilə nəticələnib. Bildiyimiz kimi, Nvidia şirkətinin son dövrlərdə texnologiya dünyasında önəmli yerə sahib olmasının əsas səbəbi də məhz süni intellekt texnologiyalarıdır. Daha doğrusu süni intellektə olan tələb artıqca Nvidia şirkəti də daha çox qrafik kart tədarük edir. Hətta ötən il şirkət bazar dəyərini artıraraq Amazon kimi nəhəngi geridə qoymağı bacardı. Həmçinin süni intellekt Huang ailəsindən olan Lisa Su-nu da milyarder edib. Belə ki, AMD şirkətinin CEO-su Lisa artıq 1.2 milyard dollarlıq şəxsi sərvətə malikdir.
Qeyd edək ki, dünyadakı ən zəngin 500 adamdan 30-nun sərvətindəki artım, Bloomberg Qlobal Süni intellekt indeksi ilə əlaqələndirilir. Bu ilin əvvəlindən bu yana milyarderlərlərin sərvəti süni intellekt hesabına daha 124 milyard dolları artıb. Maraqlısı budur ki, bu, Bloomberg Milyarderlər İndeksində yer alan milyarderlərin topladığı ümumi sərvətin 96%-i təşkil edir. Süni intellektdəki inkişaflardan ən çox faydalananlar arasında Mark Zuckerberg və Jensen Huang yer alır. Bundan əlavə süni intellektin faydasını görənlər arasında Amazon şirkətindən olan Jeff Bezos və Microsoft şirkətini təmsil edən Steve Ballmer var.
