Bildiyimiz kimi, texnologiya nəhəngləri Microsoft və Google arasında brauzer rəqabəti illərdir davam edir. Lakin Microsoft son addımı ilə bu rəqabətə fərqli bir yanaşma tətbiq edib. Belə ki, istifadəçilər Microsoft şirkətinin Bing axtarış sistemində Chrome brauzerini axtararkən onların Microsoft-un öz brauzeri olan Edge-in əks olunduğu banner qarşılayır və Chrome-un bağlantılarını gizlədir.
Yeni ortaya çıxarılan bu yanaşma, xüsusi olaraq Microsoft hesabı ilə daxil olmayan Bing istifadəçilərini hədəfləyir. Windows 11-də Bing-də Chrome-u axtaran istifadəçilər “Microsoft tərəfindən dəstəklənir” başlıqlı banner görürlər. Banner istifadəçilərə yeni veb brauzer yükləməyə ehtiyac olmadığını bildirir və vurğulayır ki, Edge vaxta və pula qənaət edən sürətli, təhlükəsiz və müasir veb təcrübəsi təklif edir. İnsanlar Edge və Bing-dən istifadə edərək Chrome-u endirməyə çalışarkən Microsoftun öz brauzerində belə bir “reklam” göstərməsi başa düşüləndir. Lakin hadisə bununla bitmir. Eyni zamanda, Bing axtarış mühərriki Chrome yükləmək bağlantılarını da istifadəçilərdən gizlədir. Bannerin bir az altında yerləşən axtarış nəticələrinin əksəriyyəti bulanıq görünsə də, linklərə daxil olmaq üçün ekranı aşağı sürüşdürüb “Daha çox gör” seçiminə klikləməlisiniz.
Microsoft-un bu addımı texnologiya sahəsində xüsusilə təcrübəsiz istifadəçilərə yönəldilə bilər. Chrome yükləməsini axtaran əksər istifadəçilər artıq bu brauzeri endirməyə qərarlıdırlar, lakin daha az məlumatlı olanlar bannerin təqdim etdiyi iddialara əsasən Edge-i seçə bilərlər. Qeyd etmək lazımdır ki, bu vəziyyət hər istifadəçi üçün keçərli deyil. Görünən odur ki, bu reklam yalnız müəyyən regionlarda və ya məhdud sayda istifadəçilər üçün tətbiq edilir.
