Bildiyimiz kimi, Mark Zucberg tərəfindən idarə edilən Meta şirkəti uzunmüddətdir ki, Metaverse barəsində ciddi məbləğlərdə yatırımlar edirdi. Hətta bir çoxları bu yatırımların şirkətin sonu olacağını da düşünürdü. Bütün bunlara baxmayaraq Mark Metaverse xəyalı üçün əlindən gələni etməyə çalışırdı. Lakin bu gün məlum olub ki, Meta şirkətinin daha doğrusu Mark-ın Metaverse xəyalı suya düşüb, şirkət maliyyə problemi ilə üz-üzədir. Habelə şirkət kritik vəziyyətdən çıxa bilmək üçün ixtisarlara da başlayıb.
Metaverse konseptini hərkəs üçün əlçatan etmək şüarı ilə yola çıxan Meta bu işdən əl çəkmədi və boşa xərclənən milyardlarla dollara baxmayaraq investisiyalarını davam etdirdi. Nəticədə isə Meta şirkətinin milyardlarda dolları və Metaverse xəyalı suya düşdü. İndi şirkət bir çox departamentlərində iri həcmli ixtisarlara başlayıb. Bunlardan biri də milyardlarla dollar sərmayə qoyulan Meta Reality labs adlı bölmədir. Əslində bu bölmə həmçinin şirkətin Meta Quest adlı virtual başlıqlarını da hazırlayıb. Hətta bu virtual reallıq başlıqları üçün xüsusi çipsetlər belə hazırlayıb.
Əldə edilən məlumata görə Meta FAST adlı çipset istehsalı üzrə məsul olan komandadan 600 nəfəri işdən qovur. Belə ki, həftə ərzində işdən çıxarılmasına qərar verilən işçilərə kompensasiya və işdən çıxma prosedurları ilə bağlı məlumatlandırıcı elektron məktublar gəlməyə başlayıb. Fast komandası şirkətin xarici asılılığını azlatmaq üçün yaradılsa da, gözlənilən nəticəni verə bilməyib. Onu da qeyd edək ki, Meta şirkətinin çip istehsal edən digər komandası da hazırda çıxılmaz vəziyyətdədir. Görünən odur ki, metaverse xəyalı şirkətə hələ çox zərər vuracaq.
