İflas üçün müraciət edən elektrik avtomobil istehsalçısı Fisker, inventarında olan 3000-dən çox Ocean elektrik SUV modelini ucuz qiymətə satmağı planlaşdırır. Belə ki, iflas etmiş avtomobil istehsalçısı hər bir elektromobili 14 min dollara satmağı düşünür. Xatırladaq ki, 2016-cı ildə böyük hədəflərlə qurulan elektrik avtomobil istehsalçısı Fisker, keçən ay iflas elan etmişdi. Şirkətin müqaviləli istehsal modeli və alətləri ilə bağlı çoxsaylı problemlər iflasa səbəb olan əsas amillər idi.
İndi isə iflas etmiş Fisker brendi inventarında olan 3000-dən çox Ocean elektrikli SUV modelini çox ucuz qiymətə satmaq üçün icazə istəyir. Fisker tələb etdiyi təsdiqi alarsa, inventarında olan 3231 Ocean SUV avtomobilini 46,25 milyon dollara Nyu-Yorkda yerləşən American Lease avtomobil icarəsi şirkətinə satacaq. Bu o deməkdir ki, şirkət Ocean modelini hər bir avtomobil üçün təxminən 14 min dollara satacaq. Fisker Ocean-ı ilk dəfə təqdim edərkən, bu avtomobil üçün təxminən 70.000 dollar başlanğıc qiyməti təyin etmişdi. İflasa yaxınlaşarkən isə şirkət qiymətləri 25 min dollara qədər endirmişdi. Hazırda Fiskerin ən azı 1 milyard dollar borcu var. İflas ərizəsinə görə, Fiskerin təxmin edilən aktivləri 500 milyon ilə 1 milyard dollar arasındadır.
Xalis qiymətləndirmələr hələ də şirkətin hüquqşünasları vasitəsilə aparılır. Şirkətin ilk 20 kreditoruna Adobe, Google və SAP daxildir. Fisker iflas prosesi zamanı aktivlərini sataraq öhdəliklərini yerinə yetirmək istəyir. Fisker avtomobilləri ilə maraqlanan American Lease, iflas prosesindən əvvəl əslində 2100 Ocean avtomobili almağa razılaşmışdı. İflasdan sonra şirkət inventarda olan bütün nəqliyyat vasitələrini almaq istədiyini bildirdi. Avtomobil icarə şirkəti bu şansı əldən vermək istəmir.
