Cənubi Koreyalı avtomobil hissələri tədarükçüsü Hyundai Mobis və Alman optika nəhəngi Zeiss tərəfindən edilən açıqlamalara görə, hər iki şirkət avtomobilin ön şüşələri üçün holoqrafik ekranlar yaratmaq ilə bağlı strateji ortaqlığa nail olublar. Belə ki, yeni məhsul Hyundai Mobis-in Yongin, Gyeonggi-do şəhərindəki texnoloji tədqiqat mərkəzində yaradılır. Hyundai və Zeiss ön şüşədə vahid holoqrafik ekran yaratmaqla avtomobildəki bütün ekranları tək ekranla əvəz etmək niyyətindədir.
Hyundai və Zeiss düşünür ki, ön şüşədə yerləşən holoqrafik ekran istifadəçi təcrübəsində və avtomobil dizaynında böyük dəyişiklik olacaq. Yeni ekran sürücü oturacağından tutmuş sərnişin oturacağına qədər geniş ərazidə sürücülük və əyləncə məlumatlarını aydın şəkildə göstərə biləcək. Habelə, bu ekran sayəsində sürücü baxış bucağını dəyişmədən yolun səthini və ekranın məzmununu eyni vaxtda görə bilir, sürücülük təhlükəsizliyini artırır. Holoqrafik ekran sayəsində artıq bir çox LCD ekrandan ibarət alətlər panelinə ehtiyac qalmaya bilər. Sərnişinlər üçün əyləncə məzmunu birbaşa onların görmə sahəsinə quraşdırıla bilər.
Hyundai Mobis-in press-relizində bildirilir ki, hər iki şirkət sentyabr ayında holoqrafik ön şüşə ekranının prototipinin istehsalını başa çatdırıb və avtomobil istehsalçısının müştərilərinə nümayiş etdirib. Kütləvi istehsal üçün konkret vaxt qrafikinə gəlincə, Hyundai Mobis bunun 2027-ci ildə olacağını, Zeiss isə 5 il ərzində buna nail olmağı planlaşdırdıqlarını açıqlayıb.
