Huawei şirkətinin icraçı direktoru Richard Yu, HarmonyOS əməliyyat sistemi ilə işləyən cihazlarının sayının 900 milyonu ötdüyünü və 1 milyarda yaxınlaşdığını açıqlayıb. Çin brendi keçdiyi çətin prosesə baxmayaraq, əhəmiyyətli artıma nail olmağı bacarıb. Qeyd edək ki, Huawei brendi uzun müddətdir ki, texnoloji sanksiyalar səbəbindən liderliyini itirmişdi. İndi isə şirkət öz texnologiyaları vasitəsi ilə yenidən dirçəlməyə başlayıb.
![HarmonyOS](https://tedroid.com/media/2024/06/huawei-harmonyos-istifadecilerinin-sayi-1-1.webp)
Bloomberg-in verdiyi xəbərə görə, HarmonyOS sisteminin aktiv istifadəçilərinin sayı 900 milyonu ötüb. Huawei-nin İstehlakçı Biznes Qrupunun prezidenti Richard Yu tərəfindən açıqlana rəqəm ABŞ sanksiyaları və sənayedəki sərt rəqabətlə mübarizə aparan Çin şirkətinin əhəmiyyətli uğur qazandığını göstərir. Təcrübəli direktor bildirib ki, hazırda təxminən 900 milyon Huawei cihazı HarmonyOS ilə işləyir ki, bu da bir neçə ay əvvəllə müqayisədə əhəmiyyətli artımdır. Bundan əlavə, o, həmçinin 2024-cü ilin ilk beş ayında premium Huawei smartfonlarının satışlarının 72% artdığını bildirib.
![HarmonyOS](https://tedroid.com/media/2024/06/huawei-harmonyos-istifadecilerinin-sayi-2-1.webp)
Hesabatda Mate 60 Pro-nun satışa çıxarılmasının bu yüksəlişdə mühüm rol oynadığı vurğulanır. ABŞ rəsmilərinin Çin şirkətlərinin istehsal edə bilməyəcəyini müdafiə etdiyi 7 nm prosessora sahib olan bu smartfon Huawei brendinin smartfon satışlarını xeyli canlandırıb. Bütün bu inkişaflar Huawei-yə birinci rübdəki mənfəətini beş dəfədən çox artırmağa və Apple və digər Çin rəqiblərindən bazar payını ələ keçirməyə kömək etdi.