Mobil texnologiyalar durmadan inkişaf edir. Belə ki, texnologiya sahəsinin iki nəhəngi Huawei və Ericsson 3G, 4G və 5G patentləri üzrə uzunmüddətli lisenziya müqaviləsi imzalayıb. Bununla da hər iki şirkət şəbəkə infrastrukturu və istehlakçı qurğuları üzərində əməkdaşlıqlarını davam etdirəcək. Ericsson şirkətinin yaydığı məlumata görə ən son yəni 5G mobil standartı üzrə patentlər daxil olmaqla qarşılıqlı lisenziya müqaviləsi bağlanılıb.
Maraqlısı budur ki, Huawei və Ericsson arasındakı lisenziya müqaviləsi həm də 3GPP, ITU, IEEE, IETF kimi geniş spektrli standartlara aid patentləri də əhatə edir. Ümumi olaraq desək, yeni imzalanan müqavilə ən çox istehlakçılara fayda verəcək. Müqavilənin maliyyə şərtləri ilə bağlı heç bir məlumat verilməyib. Lakin Ericsson tərəfindən yayılan məlumatda əqli mülkiyyət hüquqlarının lisenziyalaşdırılmasından təxmini 11 milyard SEK yəni 1 milyard dollar gəlir gözlənildiyi bildirilib. Ericsson şirkətinin Əqli Mülkiyyət üzrə Baş Direktoru Kristina Peterssonun sözünə görə, bu “balanslaşdırılmış yanaşma” hər iki tərəfin maraqlarına uyğundur və istehlakçılara da fayda verəcək.
Qeyd edək ki, hazırda Ericsson şirkəti 60 mindən çox patent portfelinə malikdir. Həmçinin şirkət hər il tədqiqat və inkişaf üçün 4 milyard dollar sərmayə ayırır. İsveç mərkəzli mobil texnologiyalar şirkəti uzunmüddətli lisenziya müqavilələri ilə gələcəkdə daha çox gəlir əldə edəcəyini planlayır. Bundan əlavə ötən il Huawei şirkəti 4505 müraciət ilə Avropa Patent Ofisinin patent müraciətləri siyahısında liderlik edir.
