Ötən aylarda X əvvəlki adı ilə Twitter platforması istifadəçi adlarının silinməsi ilə bağlı açıqlamarına görə gündəmə gəlmişdi. Belə ki, platformada uzunmüddətdir ki, istifadə edilməyən profil adları artıq silinəcəkdi. İndi isə Elon Musk X platformasında uzunmüddətdir işlədilməyən vaxtı keçmiş istifadəçi adlarını sataraq pul qazanmağa çalışır. Əslində bu qərar elə də təəccüblü deyil. Çünki son dövrlərdə X platformasındakı dəyişikliklər məhz bu hadisənin baş verəcəyinə işarət edirdi.
Qeyd edək ki, Elon daha əvvəl X istifadəçilərinin bot olmadığını dəqiqləşdirmək üçün aylıq abunəlik sisteminə keçid ediləcəyi barədə məlumat vermişdi. O cümlədən X platfromasının artıq sosial mediadan çox maliyyə platformasına çevriləcəyi də artıq hərkəsə məlumdur. Məhz bu hədəflərinə çatmaq üçün Elon Musk indi vaxtı keçmiş istifadəçi adlarını sataraq pul qazanmaq istəyir. 1.5 milyard istifadə edilməyən profil adı artıq satışa çıxarılır. The New York Times mənbəsinə görə şirkət bəzi qurumlara xüsusi istifadəçi adlarını rekord qiymətlərə satmaq istəyir. Belə ki, bəzi vaxtı keçmiş istifadəçi adları üçün 50 min dollar təklif olunur.
Maraqlısı budur ki, X şirkəti artıq istifadə edilməyən istifadəçi adlarını rahatlıqla sata bilmək üçün rəqəmsal istifadəçi adı bazarı yaradır. Görünən odur ki, Elon bu vəziyyətdən maksimum karlı çıxmaq istəyir. Əslində bu addımlar platformanı bataqlıqdan çıxarmaq üçün atılan son addımlardır. Çünki, hazırda 44 milyard dollara alınan şirkətin dəyəri sadəcə 19 milyard dollardır. Yəni Elon təxminən 25 miyard dollar zərərdədir. Məhz bu zərərin qarşılanması üçün də əlindən gələni edir.
