SpaceX və Tesla şirkətlərinin sahibi, məşhur Amerikalı iş adamı Elon Musk ötən gecə X-də verdiyi açıqlamada, süni intellekt texnologiyaları istehsal edən OpenAI-nin çatbotu ChatGPT-nin iPhone-lara inteqrasiya edilməsi ilə bağlı fikirlərini bölüşüb. Onun sözlərinə görə OpenAI şirkətinin çatbotunun mobil cihazlara inteqrasiyası ciddi təhlükəsizlik problemlərinə səbəb olacaq. Üstəlik daha da irəli gedən Elon Musk, birbaşa olaraq Kaliforniyalı texnologiya nəhəngi Apple-ın məhsullarının şirkətlərində qadağan olunacağını açıqladı.
Əgər Apple əməliyyat sistemi səviyyəsində OpenAI-ni inteqrasiya edərsə, Apple məhsulları mənim şirkətlərimdə qadağan olunacaq deyən, Elon Musk – “Bu, yolverilməz bir təhlükəsizlik pozuntusudur” deyə vurğulayıb. Elon Musk, Apple-ın öz süni intellektini istehsal edəcək qədər ağıllı olmamasının açıqca absurd olduğunu da qeyd edib.
Apple-ı müştərilərinə xəyanət etməkdə günahlandıran Musk, istifadəçi məlumatları OpenAI-a ötürüldükdən sonra Apple-ın orada baş verənlərdən xəbərsiz olacağını deyib.
Qeyd edək ki, ötən gecə sosial media platformasında Elon Musk-ın yazıları yüz minlərlə bəyənmə və repost alıb.
Ümumdünya Tərtibatçı Konfransında (WWDC) ChatGPT-nin bir çox Apple məhsullarında, xüsusən də iPhone və Mac kompüterlərində istifadə oluna bilən virtual köməkçi Siri-yə inteqrasiya olunacağı elan edildikdən sonra bir çox mütəxəssis mövzuya ehtiyatla yanaşıb. Eyni konfransda Apple həmçinin “Apple Intelligence” adlı öz süni intellekt texnologiyasını və sentyabr ayında iPhone-lara gələcək iOS 18-i də təqdim edib.
