Cooler Master altı fərqli rəngdə CryoFuze 5 termal pastalarının yeni seriyasını təqdim edib. Qeyd edək ki, Cooler Master yeni məhsulunu AI termal pasta adlandırır və ardıcıl xassələri təmin etmək üçün “nano-almaz molekulyar texnologiya” istifadə etdiyini iddia edir. Şirkət rəngli termal pasta hazırlamaq üçün sink oksidi və alüminium tozundan istifadə edir. İstehsalçıya görə, termal pasta təkcə rəngli deyil, həm də səmərəlidir – onun istilik keçiricilik əmsalı 14 W/m‧K-dir.
Yeni termal pastanın rəng diapazonu, çox güman ki, sadəcə bir marketinq taktikasıdır. Lakin bu, kifayət qədər monoton prosesə rəng əlavə etməklə PC montajını lentə alan məzmun yaradıcıları üçün faydalı olacaq. Xatırladaq ki, bu Cooler Master-ın ilk rəngli termal pastası deyil, şirkət əvvəllər CryoFuze Violet təqdim etmişdi. Şirkət iddia edir ki, yeni AI termal pasta maksimum performansdan yararlanmaq istəyən overclockerlər üçün mükəmməldir. CryoFuze 5 -50 °C ilə 240 °C arasında işləyə bilər və 14 W/m‧K istilik keçiriciliyinə malikdir.
Cooler Master, termal pastanın özündə süni intellekt haqqında heç bir şey olmasa da, yeni məhsulunun reklamına “AI” sözünün əlavə etməklə daha çox maraq cəlb edib. Bəlkə də Cooler Master super güclü Intel Falcon Shores və ya Nvidia B100 və B200 kimi süni intellekt çiplərini hədəfləyir. Qeyd etmək lazımdır ki, ən mükəmməl müasir termal pastaların istilik keçiricilik əmsalının maksimum dəyəri 16 Vt/m‧K-dan yuxarı qalxmır.
