Texniki cəhətdən ən son Nvidia sürətləndiricilərinə çıxışı olmayan Çin müxtəlif yollarla maneələri aşmağı bacarır. Belə ki, Çin hökuməti Nvidia sürətləndiriciləri ilə bağlı embarqonu Amazon və Microsoft vasitəsilə dəf etməyin bir yolunu tapıb.
Məhsuldar süni intellekt həlləri tam sürətlə inkişaf etdiyi bir dövrdə, maşın öyrənmə modellərinin öyrədilməsi ən kritik məqamlardan hesab olunur. Məhz Nvidia-nın sürətləndiricilərinin illərdir satılmasının ən böyük səbəbi budur. Reuters-in hesabatına görə, Çin hələ də Nvidia-nın A100 və H100 kimi ən yeni sürətləndiricilərinə çıxış əldə etməyi bacarır. Belə ki, bu sayədə Çin süni intellekt layihələrini ən səmərəli şəkildə öyrədə bilir. Çin heç də zənn edildiyi kimi süni intellekt yarışında geridə qalmır.
Çinin bu serverləri Amazon və Microsoft kimi bulud infrastrukturu təmin edən şirkətlərdən xidmətlər alaraq təmin etdiyi bildirilir. Embarqolar səbəbindən Çinə texnologiya və proqram təminatının ixracı qadağandır, lakin bulud infrastrukturundan istifadə ilə bağlı heç bir məhdudiyyət yoxdur. Bir çox Çin universitetinin müəyyən tədqiqat layihələri çərçivəsində Amazon və Microsoft kimi şirkətlərdən xidmətlər aldığı və daha sonra maşın öyrənmə modellərini öyrətdiyi bildirilir. Xidmət Çin mərkəzli vasitəçi şirkətlərdən alınır. Beləliklə, Çin dolayı yol ilə də olsa Amazon və Microsoft şirkətləri sayəsində embarqonu aşa bilir. Məsələ uzun müddətdir ki, Konqresin gündəmindədir və bəzi konqres üzvləri Çinə təqdim olunan bulud infrastrukturu xidmətlərinin qara siyahı nəzarətinə tabe olmasını istəyirlər. Xüsusilə seçkiqabağı dövrdə bununla bağlı tənzimləmənin olub-olmayacağı bəlli deyil.
