Son dövrlərin ən populyar yeniliyi olan ChatGPT yüzlərlə istifadəçinin fikrincə getdikcə tənbəlləşir və insanlara problemi özləri həll etməsini tövsiyyə edir. Süni intellekt çatbotu ona verilən tapşırıqları tam olaraq yerinə yetirmir və insanlara yardım etmək istəmir. OpenAI şirkəti artıq bu məsələ ilə bağlı yeni bir araşdırmaya başladığını elan edib.
Ümumiyyətlə süni intellekt alətləri insanların problemlərini bir neçə saniyədə həll etməsi və dəqiq cavablar verməsi ilə məşhurluq qazanmışdı. Habelə OpenAI şirkətinin GPT-4 dil modeli ilə işləyən ChatGPT süni intellekt əsaslı çatbotlar arasında ən yaxşı seçim hesab olunurdu. Lakin indi yüzlərlə istifadəçi şikayət mesajları yazır. Onların sözlərinə görə süni intellekt çatbotu artıq problemlərin həllini dəqiq şəkildə bildirmir və bunu istifadəçilərin özlərinin həll etməsini tövsiyyə edir. Qeyd edək ki, noyabr ayının sonlarından etibarən Reddit platformasında və OpenAI forumlarında yer alan bir çox istifadəçi ChatGPT tənbəlləşir başlığı ilə yüzlərlə şikayət mesajları yazmağa başlayıb.
İstifadəçilər bildirir ki, süni intellekt çatbotu uzun mesajlara və ya yazılara artıq tam olaraq cavab vermir. Bəzi istifadəçilər bunun birbaşa olaraq OpenAI tərəfindən edilən bir dəyişiklik olduğunu da iddia edir. Belə ki, onlara görə OpenAI ChatGPT çatbotunun uzun və detallı cavablar yerinə effektivliyi artıra bilmək üçün qısa cavablar verməsini istəyir. Son dövrlərdə şirkət daxilində baş verən idarəetmə problemlərinin süni intellekt tərəfinə yayılıb-yayılmadığı isə hələlik məlum deyil.
