Təyyarələri ilə bütün dünyada məşhur olan Boeing şirkətinin CEO-su ilin sonunda şirkətdən ayrılacaq. Ümumiyyətlə, şirkət son vaxtlar bir çox pis xəbərlə gündəmdədir. Boeing-in baş direktoru Dave Calhoun-un ilin sonunda şirkətdən ayrılacağı şirkət tərəfindən bu gün rəsmi olaraq açıqlandı. Hələlik, yeni CEO seçməyən şirkət, son günlərdə biznes tərəfində heç də yaxşı nəticələr əldə edə bilməyib.
Xatırladaq ki, Alaska Airlines şirkətinin Boeing 737 Max 9 sərnişin təyyarəsi havaya qalxdıqdan 35 dəqiqə sonra pəncərə də daxil olmaqla gövdəsinin bir parçasının qopmasından sonra Portlendə qayıtmalı olub. Alaska Airlines, təyyarədə 171 sərnişin və 6 ekipaj üzvünün olduğunu və təyyarənin “sağ-salamat eniş etdiyini” bildirib. Həmçinin, Aviaşirkət qeyd etmişdi ki, onun 65 təyyarədən ibarət 737 Max 9 təyyarə parkı təhlükəsizlik yoxlamaları üçün “müvəqqəti olaraq” istifadədən çıxarılacaq. Bununla əlaqədar olaraq Boeing şirkəti uçuş zamanı gövdəsinin bir hissəsini qoparan 737 Max 9 tipli təyyarə ilə bağlı səhvlərini qəbul etdiklərini, yəni günahı aviaşirkətin üzərinə atmadıqlarını açıqlayıb.
Şirkətin baş direktoru Calhoun o zaman bildirmişdi ki, onlar hadisəyə görə məsuliyyəti öz üzərlərinə götürürlər və “prosesi tam şəffaflıqla aparacaqlar”. Boeing işçilərinə müraciət edən Calhoun, “Bu vəziyyətə ilk növbədə səhvimizi etiraf edərək yaxınlaşacağıq. Biz atdığımız hər addımda 100 faiz və tam şəffaflıqla hərəkət edəcəyik” deyə bildirib. Bu hadisədən sonra böyük addımlar atıldı. Məsələn, ABŞ Nəqliyyat Departamentinin Federal Aviasiya İdarəsi hadisədən sonra 171 737 Max 9 təyyarəsinin uçuşunu müvəqqəti olaraq qadağan edib. Agentlik açıqlamasında isə, uçuşu qadağan olunan Max 9-ların hər təyyarə başına 4-8 saat davam edəcək yoxlamaya göndəriləcəklərini bildirmişdi. Daha sonra FAA aviaşirkətlərin səbirsizliklə gözlədiyi xəbəri paylaşaraq Boeing 737 Max 9 təyyarələrinin yenidən uçuşuna icazə verdi.
FAA həmçinin Boeing 737 MAX seriyasının istehsalının artırılmasına icazə verməyəcəklərini açıqlayıb. Hətta FAA Administratoru Mike Whitaker, bundan sonra “Boeing üçün hər şey eyni olmayacaq” demişdi. İndi isə elan olunub ki, Boeing CEO-su ilin sonunda şirkətdən tamamilə ayrılacaq. Hələlik bu ayrılığın səbəbləri ətraflı açıqlanmasa da, yaşanan 737 Max 9 problemi bunun əsas səbəblərindən biri ola bilər.
