Elon Musk tərəfindən daha əvvəl Twitter adı ilə tanınan platformanın sonrada X olaraq fəaliyyətinə davam etməsi artıq hərkəsə məlumdur. Bir çox mənfi reaksiyalara səbəb olan bu dəyişiklik bir müddət Elon Musk-ı dünyada gündəm mövzusuna çevirmişdi. İndi isə Avropa Birliyi Elon Musk-ın X platformasını qanunsuz məzmun və dezinformasiyaya görə araşdırmağa başlayıb. Qeyd edək ki, araşdırma platformanın Rəqəmsal Xidmətlər Aktının tələblərinə cavab verib-verməməsi ilə bağlı aparılacaq.
Ümumiyyətlə Avropa Birliyi ötən aylarda qəbul etdiyi Rəqəmsal Xidmətlər Aktı ilə bir çox platformanın rəqabəti pozmasına qarşı müəyyən tələblər irəli sürmüşdü. Bu akt çərçivəsində isə Avropa Birliyi müxtəlif sosial media platformalarını araşdırmışdı. İndi isə növbə X platformasını araşdırmağa gəlib çatıb. Qeyd edək ki, Avropa Komissiyasının daxili bazar üzrə cavabdeh üzvü Thierry Breton, X hesabından araşdırma xəbərini istehza ilə paylaşaraq platformanın şəffaflıq və qanunsuz məzmunla mübarizə öhdəliklərini pozmaqda şübhəli olduğunu bildirdi.
X platformasının sentyabr ayında təqdim etdiyi risklərin qiymətləndirilməsi hesabatından, platformanın noyabrda dərc etdiyi şəffaflıq hesabatından sonra Avropa Birliyi araşdırma başlatmaq qərarına gəlib. Hazırda araşdırma 45 milyondan çox istifadəçiyə sahib olan platformanın bütün sahələrində davam edir. Hələlik isə onun tələbləri pozub-pozmadığı barədə heç bir məlumat mövcud deyil.
