Apple şirkəti İndoneziyanın tətbiq etdiyi iPhone qadağasını aradan qaldırmaq üçün tədbir görüb. Belə ki, Apple qadağanın aradan qaldırılması üçün İndoneziyaya 10 milyon dollar ayırmaq niyyətindədir.
Bildiyimiz kimi, bir neçə müddətdir ki, İndoneziyada iPhone 16 satışları qadağan edilib. Apple ilə İndoneziya hökuməti arasındakı mübahisələrin qısa müddətdə həll olunacağı gözlənildiyi halda, Apple nəhayət investisiya etməyə qərar verib. Belə ki, Apple qadağanın qaldırılması üçün ölkəyə 10 milyon dollar vəsait ayıracaq. İndoneziya hökuməti Apple ilə investisiya mübahisəsinə görə yeni nəsil Apple cihazlarına qarşı sərt mövqe tutmağa davam edir. Ölkənin sənaye naziri Agus Gumiwang Kartasasmita, iPhone 16-nın tənzimləyici qaydalara uyğun gəlmədiyini əsas gətirərək satışını qadağan edib.
Nazir Kartasasmita, bildirib ki, “İndoneziyada işləyən hər hansı iPhone 16 cihazı aşkar edilərsə, bu qeyri-qanuni qəbul ediləcək. Bu cihazlar barədə bizə məlumat verin”. Bu qərar təkcə iPhone 16-nı deyil, həm də 16 Pro seriyası və Apple Watch Series 10 kimi yeni Apple məhsullarını əhatə edirdi. Apple bu böhranı həll etmək üçün 10 milyon dollar sərmayə ilə yeni fabrik qurmağı planlaşdırır. Bu obyekt Apple-ın yerli təchizatçılarla tərəfdaşlığı sayəsində həyata keçiriləcək. Bununla belə, bu sərmayənin İndoneziya Prezidenti Prabowo Subianto administrasiyası tərəfindən qoyulan 40% yerli məzmun tələbini yerinə yetirmək və qadağanı aradan qaldırmaq üçün kifayət edib-etməyəcəyi bəlli deyil. Qeyd edək ki, artıq Google Pixel seriyası da, oxşar vəziyyətlə üzləşir.
