Avropa Birliyi bir daha Apple-dan qaydalara əməl etməsini tələb edib. Belə ki, Avropa bu dəfə Apple şirkətindən “Ayrı-seçkiliyə əsaslanan coğrafi bloklama” sisteminə son qoymağı tələb edir. Avropa İttifaqı, Apple-ın coğrafi bloklama tədbirlərinin Aİ-nin istehlakçıların müdafiəsi qaydalarını poza biləcəyini ortaya çıxarıb.
Ötən günlərdə Avropa Komissiyası və İstehlakçıların Hüquqlarının Müdafiəsi Əməkdaşlıq Təşkilatının birgə araşdırması ortaya çıxıb. Yeni məlumata görə, Apple-ın App Store, iTunes Store, Arcade, Kitablar, Podkastlar və Apple Music xidmətlərində tətbiq etdiyi “bəzi potensial qadağan olunmuş coğrafi bloklama” sistemi ortaya çıxarılıb. Hazırda istifadəçilərin Apple hesabının qeydiyyatdan keçdiyi ölkə tərəfindən təqdim edilən ödəniş üsullarına məhdudiyyət qoyulması, digər Aİ/EEA ölkələrində təklif olunan proqramların yüklənməsinin qarşısının alınması və regiona xas, məhdudlaşdırıcı interfeyslərə malik olmaq kimi məsələlər Avropa Birliyinin gündəmindədir.
CPC Network öz press-relizində bildirib ki, “Bu xidmətlərin tətbiq versiyasında istehlakçılara yalnız hesablarını qeydiyyatdan keçirdikləri ölkə üçün uyğunlaşdırılmış interfeysə giriş imkanı verilir və onlar bu interfeysi dəyişməyə cəhd edərkən, Aİ-nin anti-geoblokinq qaydalarına zidd olan ciddi çətinliklərlə üzləşirlər”. Məsələ ilə bağlı Avropa Komissiyası üzvü Margrethe Vestager qeyd edir ki, “Biz coğrafi bloklama ilə mübarizəni sürətləndiririk. Heç bir şirkət, istər böyük, istərsə də kiçik, müştərilərə qarşı milliyyətinə, yaşayış yerinə və ya fəaliyyət yerinə görə ədalətsiz ayrı-seçkilik etməməlidir”. Apple bir ay ərzində bu problemləri həll etməyi öhdəsinə götürməsə, sanksiyalarla üzləşə bilər.
