Apple ilə İndoneziya hökuməti arasındakı bir müddətdir davam edən gərginliyin böyük bir investisiya ilə aradan qaldırıldığı açıqlanıb. Belə ki, Apple rəsmi açıqlama verməsə də, İndoneziyaya 1 milayrd dollar sərmaye qoymağa razı gəlib.
Xatırladaq ki, ötən həftələrdə Apple və İndoneziya hökuməti arasındakı gərginlikdən bəhs etmişdik. Apple iPhone 16-nı şərtləri yerinə yetirə bilmədiyi üçün İndoneziyada satışa çıxara bilməmiş və hökumətlə razılığa gəlmək üçün sərmayə qoymağa qərar vermişdi. ABŞ texnologiya nəhəngi ilk mərhələdə 10 milyon dollar, daha sonra 100 milyon dollarlıq investisiya təklifləri ilə hökumətin qarşısına çıxıb. Lakin bütün bunlar kifayət etməyib.
İndoneziyanın İnvestisiya naziri Rosan Roeslani, Apple-ın ölkəyə 1 milyard dollar sərmayə qoyacağını iddia edib. Apple məsələ ilə bağlı heç bir açıqlama verməyib. Ancaq bu vəziyyət gələn həftə dəyişəcək. Nazir Rosan Roeslani tərəfindən edilən açıqlamaya görə, Apple gələn həftə 1 milyard dollarlıq investisiya ilə bağlı açıqlama verəcək. İndoneziya qanunlarına görə, məhsulun ölkədə satışa təqdim edilməsi üçün 40 faiz yerli tərkib hissəsi olmalıdır. Apple-ın iPhone 16 seriyasında qarşılaya bilmədiyi şərt də məhz budur. Digər tərəfdən Apple Watch Series 10 da iPhone 16 ilə eyni aqibəti yaşayıb. Bununla belə, 1 milyard dollarlıq investisiya embarqonu aradan qaldırmağa imkan verəcək.
