Amazon-un baş direktoru Endi Jassy bildirib ki, şirkətin hazırkı işçilərinin çoxunu qovub süni intellekt ilə əvəzləyəcək. Beləliklə, son dövrlərdə populyarlaşan süni intellekt ilk dəfə olaraq insanların işini ciddi bir şəkildə əlindən alır.
Amazon şirkətinin baş direktoru Endi Jassy süni intellektin şirkətin bir çox sahələrinə sürətlə inteqrasiya olunduğunu və yaxın 5 ildə işçilərin sayının azalacağını bildirib. Jassy işçilərə yazdığı məktubda qeyd edib ki, hazırda 1000-dən çox süni intellekt layihəsi üzərində işləyir və daha bir çoxu yoldadır. Şirkət bir sıra məhsullar və proqram təminatı, o cümlədən Alexa+, Alexa-nın təkmil versiyası, alış-veriş köməkçiləri, tacir və reklam alətləri üzərində işləyir.
Süni intellektin bəzi işlərdə daha az insana, bəzi yeni işlərdə isə daha çox mütəxəssisə ehtiyac duyacağını ifadə edən Jassy, texnologiyanın şirkətin səmərəliliyini əhəmiyyətli dərəcədə artırdığını ifadə edib. Süni intellektin töhfəsi artıq anbar idarəçiliyindən müştəri xidmətinə, robotlardan proqnozlaşdırma sistemlərinə qədər bir çox sahədə hiss olunur. Amazon 2022-ci ildən bəri 27 000-ə yaxın işçisi ilə yollarını ayırıb. Şirkət indi öz texnologiyaları və bizneslərində süni intellektdən daha da fəal istifadə edərək daha kiçik komandalarla daha çox iş görməyi hədəfləyir.
