2022-ci ilin sonunda qlobal ağıllı saat tədarükləri 2021-ci illə müqayisədə 12% artıb. Counterpoint Research araşdırma şirkətinin hesabatına görə, ötən ilin ilk üç rübündəki güclü satışlar bu artımda təsirli olduğu halda, analitiklər son rübdə yüksələn inflyasiya səbəbiylə tədarüklərdə illik 2 faiz azalma qeyd ediblər. Apple, həcminə görə ümumi tədarükün 34,1% payı ilə ağıllı saat üzrə qlobal bazar lideri olaraq qalır.
Pul baxımından Apple ağıllı saat sənayesinin gəlirlərinin tam olaraq 60%-lik hissəsini təkcə əlinə alır. Analitiklər Apple şirkətinin ağıllı saat bazarında artan payını 2022-ci ilin payızında buraxılmış Apple Watch Series 8, Apple Watch Ultra və Apple Watch SE modelinə güclü tələbatla əlaqələndirirlər.
Qlobal ağıllı saat bazarını regionlara görə böldükdə Şimali Amerika 29% ilə tədarük həcminə görə ən böyük bazar olaraq qiymətləndirilir. Samsung şirkəti tədarüklərdə 12% artım ilə və 9,8% bazar payı ilə ikinci yerdədir. Çinli Huawei isə 6,7 faiz bazar payı ilə ilk üçlüyü tamamlayır. Hindistanın ağıllı saat istehsalçıları Noise və Fire Boltt daxili bazarda sürətli artım sayəsində qlobal bazarda müvafiq olaraq dördüncü və beşinci yerlərə yüksəliblər. Garmin, Amazfit və boAt təxminən 4% tuturlar. Fitbit və Xiaomi kimi brendlər müvafiq olaraq onuncu və on birinci yerlərdə qərarlaşıblar.
Keçən il satılan ağıllı saatların üçdə birindən çoxu (35 faiz) qiyməti 100 dollar və ya daha aşağı olan büdcə modelləri olub. 400 dollar və yuxarı qiymət diapazonunda olan ağıllı saatlar, əvvəlki illə müqayisədə 129% artımla ən böyük tədarük artımını göstərdi. Bildirilir ki, ağıllı saat bazarındakı artımın böyük hissəsi Apple Watch Series 8 və Watch Ultra modellərinin satışa çıxarılması ilə bağlı olub.
