Elektromobillərin populyarlaşdığı bu dövrdə şarj texnologiyaları da durmadan inkişaf edir. Belə ki, ABŞ mərkəzli Ideanomics şirkəti tərəfindən elektromobillər üçün 500 kVt simsiz şarj stansiyaları istifadəyə verilib. Maraqlısı budur ki, yüksək sürətdə enerji doldurmağa imkan verən bu stansiyalar çox soyuq havalarda belə problemsiz fəaliyyət göstərə bilir. Ümumiyyətlə elektromobillər getdikcə daha böyük həcmli batareyalara sahib olur. Məhz bu batareyaları şarj etmək üçün də bəzən bir müddət gözləmək lazım gəlir. Yeni simsiz şarj stansiyası isə bu problemi aradan qaldıracaq.
ABŞ-ın Ideanomics şirkəti elektromobillər üçün 500 kvt simsiz şarj stansiyaları istifadəyə verib. Sürətli, simsiz induktiiv şarj texnologiyası yola yerləşdirilmiş doldurma lövhələri vasitəsi ilə elektromobilləri şarj edə bilir. Bu texnologiyadan istifadə edə bilmək üçün isə elektromobillər əlavə olaraq da doldurma lövhəsi ilə təchiz edilməlidir. Məhz bu lövhələr üst-üstə gəldikdə yüksək sürətli şarj etmək mümkün olur. Hazırda bu şarj lövhələrindən bir neçəsi Long Beach limanı ve Los Angeles limanına quraşdırılıb.
Ekstremal hava şəraitlərində belə enerji doldurmağa imkan verən yeni şarj stansiyaları 125 kVt, 250 kVt, 380 kVt və 500 kVt şarj seçiminə malikdir. Qeyd edək ki, bu ilin sonuna qədər 500 kVt simsiz enerji doldurma sistemi Venture şirkətinin iki yük maşınına inteqrasiya ediləcək. Ideanomics COO-su Robin Mackie yeni sistem haqqında bildirir ki, “Venture Logistics ilə yeni layihəmiz göstərəcək ki, simsiz enerji doldurma fasiləsiz şarj infrastrukturu tələb edən orta və ağır yük maşınları üçün geniş miqyasda ən effektiv həlldir”.
