Almaniyada mənzil sahibləri və kirayənişinlər arasında yeni bir alternativ enerji trendi sürətlə yayılır. İnsanlar artıq birbaşa öz balkonlarında “tax-işlət” tipli kiçik günəş panelləri quraşdırırlar. Bu sistemlərin ən cəlbedici tərəfi quraşdırılma prosesinin çox sadə olmasıdır. İstifadəçilər heç bir ustaya və ya texniki mütəxəssisə ehtiyac duymadan paneli sadəcə adi elektrik rozetkasına taxaraq dərhal enerji istehsalına başlaya bilirlər. Məlumata görə, artıq ölkə üzrə bu tipli balkon panellərinin ümumi gücü 1 Giqavatı (GW) geridə qoyub.
Bu sadə sistemlər ev təsərrüfatlarına aylıq elektrik xərclərinə əhəmiyyətli dərəcədə qənaət etməyə imkan yaradır. Orta hesabla bir balkon paneli ildə 760 kWh enerji istehsal edə bilir. Bu isə bir nəfərlik evin ehtiyacının təxminən yarısını qarşılamaq deməkdir. Əldə edilən bu enerji ilə evin daimi işləyən cihazların məsələn, soyuducu, internet modemi və ya işıqlandırma sistemini rahatlıqla işlətmək mümkündür. Qənaəti artırmaq istəyən istifadəçilər paltaryuyan və ya qabyuyan kimi cihazları əsasən günəşin ən çox olduğu saatlarda işlədərək enerjidən tam səmərəli istifadə edirlər.
Almaniyada uğur qazanan və sadələşdirilmiş qanunlarla dəstəklənən bu model hazırda digər ölkələrin də diqqətini cəlb edir. Artıq Avstriya, Fransa, İtaliya, İspaniya və Polşa kimi bir sıra Avropa dövlətlərində vətəndaşlar bu sistemlərdən istifadə etməyə başlayıblar. Bununla yanaşı, ABŞ-ın bir neçə ştatında və Böyük Britaniyada analoji panellərin istifadəsinin qanuniləşdirilməsi istiqamətində rəsmi addımlar atılır. Beləliklə, mənzillərdə fərdi günəş enerjisi istehsalı yaxın gələcəkdə bütün dünyada adi bir hal alacaq kimi görünür.
