Canalys mənbəsi 2023-cü ilin birinci rübündə ən çox satılan flaqman smartfonlar ilə bağlı hesabat yayımlayıb. Qeyd edək ki, Qlobal məlumatlara əsasən hazırlanan hesabata görə Apple bu ilin birinci rübündə flaqman smartfon bazarına liderlik edib. Belə ki, bu ilin birinci rübündə dünyada ən çox satılan flaqman smartfon məhz iPhone 14 Pro Max modeli olub. Apple şirkəti iPhone 14 seriyasını təqdim etdikdə sonra smartfon bazarında əsas üstünlük məhz iPhone 14 Pro seriyasına keçmişdi. Bunun əsas səbəbi isə brendin yeni seriyada təqdim etdiyi yeniliklər və performansdır.
Maraqlısı budur ki, 2023-cü ilin birinci rübündə ən çox satılan flaqman smartfonlar siyahısında ikinci yeri məhz iPhone 14 Pro modeli tutur. Hətta siyahının üçüncü yerində də Apple brendinə məxsus olan iPhone 13 modeli dayanır. Bununla da deyə bilərik ki, bu ilin əvvəlində ən çox satılan flaqman modelləri məhz iPhone smartfonlarıdır. Lakin siyahının davamında Samsung brendinin Galaxy S23 Ultra, Galaxy S23 və Galaxy S23 Plus modellərini də görmək mümkündür. Qeyd edək ki, 2 il əvvəl təqdim edilən iPhone 12 modeli ötən aylarda təqdim edilmiş Galaxy S23 Plus modelindən daha çox satılıb.
Ötən il ilə müqayisədə 4.7% artım göstərən flaqman smartfon bazarında hələdə qatlana bilən modellər üstünlük təşkil etmir. Yalnız ən çox satılan smartfonlar arasında bir ədəd qatlana bilən Galaxy Z Flip4 modelini görmək mümkündür. Xatırladaq ki, ötən ilin ən çox satılan flaqman modeli iPhone 13 olmuşdu. Siyahının 2-ci və 3-cü yerində isə müvafiq olaraq iPhone 13 Pro Max və iPhone 14 Pro Max dayanırdı. Ötən il olduğu kimi bu ilin əvvəlində də flaqman smartfon bazarında Apple liderdir.
