Bildiyimiz kimi, Azərbaycanın ilk vençur kapitalı fondu “Caucasus Ventures” ötən ilin sonunda yaradılıb. Rəqəmsal İnkişaf və Nəqliyyat Nazirliyinin strukturunun yenidən qurulması və rəqəmsal inkişaf yolunda müxtəlif layihələrə dəstək verməsi səbəbindən bu fondun yaradılması qaçılmaz olub. Startap ekosisteminin əsas təsisçilərindən və oyunçularından biri olan Məmməd Kərimin təsis etdiyi fond ölkəmiz üçün çox uğurlu biznesdir. Caucasus Ventures-in kapitalı 11,3 milyon manatdır. Fonda Rəqəmsal İnkişaf və Nəqliyyat Nazirliyi 5 milyon manat, “PAŞA Holdinq” Şirkətlər Qrupu 5 milyon manat, fərdi sahibkarlar isə 1,3 milyon manat investisiya yatırıb. Fondun əsas məqsədi həm Azərbaycanda, həm də regionda startaplara investisiya qoymaqdır. İndi isə Caucasus Ventures bu ilin son yatırımını da edərək portfelinə Cargon, Push30 və Money Industries startaplarını əlavə edib.
Caucasus Ventures-in əsas diqqəti Qafqaz, Türkiyə, Şərqi Avropa və Mərkəzi Asiyadır. Fond əsasən bu regionlarda Saas, Fintech və digər startaplara sərmayə qoymağı hədəfləyir. Caucasus Ventures iki mərhələdə startaplara sərmayə qoyur. Birinci mərhələdə investisiyanın həcmi 50 min dollara qədər, ikinci mərhələdə isə 200 min dollara qədərdir. Qeyd edək ki, adı çəkilən startaplardan Cargon qitələrarası çatdırılmaları asanlaşdıran nəqliyyat platformasıdır. Habelə Push30 startapı abunəlik qarşılığında müxtəlif idman zalları və fitnes məkanlarına giriş imkanı təklif edən platformadır.
Daha əvvəl isə fond 3 startapa PERKSKIT, TASS Vision və BERKM inc-ə yatırım etmişdi. İndi isə Caucasus Ventures daha 3 startapa yatırım edib. Bu startaplardan sonuncusu isə Money Industries-dir. Money Industries startapı öz növbəsində yerli finteklərə transsərhəd xidmətlər göstərmək üçün vasitəçilik edir.
