Yeni superkompüter (hesablama gücü 1,2 PFLOPS) Azərbaycanın innovasiya ekosisteminin əsas dayaqlarından birinə çevriləcək.
İqtisadiyyat naziri Mikayıl Cabbarov Bakıda “PAŞA Holdinq” MMC-nin təşkilatçılığı ilə keçirilən “INMerge” İnnovasiya Sammitində bildirib.
“Bu nəhəng hesablama gücü böyük əməliyyatların sürətli emalını və mürəkkəb analizlərin aparılmasını mümkün edəcək, iqtisadiyyatın rəqəmsallaşdırılması, avtomatlaşdırma və ağıllı istehsal sistemləri üçün yeni imkanlar yaradacaq”, – deyə o qeyd edib,
M. Cabbarov vurğulayıb ki, superkompüterin imkanlarından təkcə dövlət qurumları deyil, həm də özəl sektor, akademik dairələr və vətəndaş cəmiyyəti nümayəndələri istifadə edə biləcək: “Yüksək performanslı hesablama resurslarına çıxışın demokratikləşdirilməsi bilik mübadiləsini genişləndirəcək, proqnozlaşdırmanı təkmilləşdirəcək və sübuta əsaslanan qərarların qəbulunu gücləndirəcək. Bu addım innovasiyalara əsaslanan inkişaf strategiyamızı əhəmiyyətli dərəcədə irəli aparacaq və Azərbaycanın qlobal rəqabət qabiliyyətini yeni mərhələyə yüksəldəcək”.
Həmçinin nazir bildirib ki, ölkənin neft və qaz asılılığını azaltmaq məqsədilə son 20 ildə Azərbaycan iqtisadiyyatına 344 milyard ABŞ dollarına yaxın sərmayə yönəldilib və bunun 210 milyard ABŞ dollarından çoxu qeyri-neft sektorunun payına düşüb.
Onun sözlərinə görə, 2021–2024-cü illərdə qeyri-neft iqtisadiyyatı illik orta hesabla 6,7 % böyüyüb və ümumi iqtisadi artımın əsas hərəkətverici qüvvəsinə çevrilib: “Son 6 ildə qeyri-neft və qaz ixracı 2 dəfə artıb, valyuta ehtiyatlarımız isə tarixi maksimuma çataraq ölkənin ÜDM-i ilə eyni həcmdədir. Azərbaycan artıq kapital idxalçısı deyil, həm də kapital ixracatçısı kimi çıxış edir”.
M. Cabbarov həmçinin regionda sülhün möhkəmlənməsinin iqtisadi əhəmiyyətini vurğulayıb: “Avqustun 8-də imzalanmış tarixi sülh razılaşması Cənubi Qafqaz və Mərkəzi Asiya regionlarının iqtisadi və sosial kapitallaşmasına mühüm töhfə verəcək. Bu proses təkcə region üçün deyil, daha geniş miqyasda iqtisadi faydalar gətirəcək.”
O qeyd edib ki, Azərbaycanda biznes mühitinin və fəaliyyət göstərilən sahələrin inkişafı üçün qanunvericilik dəyişiklikləri vacibdir və ekosistemdəki yeniliklərin təşviqi önəmlidir: “İştirakçıların bu istiqamətdə təklif və fikirlərini təqdim etməsi vacibdir. Bu, həm bizim hansı istiqamətdə irəlilədiyimizi daha nizamlı və hesabatlı şəkildə göstərməyə, həm də innovasiya ekosistemində əməkdaşlığı gücləndirməyə imkan verəcək”.
