10–12 sentyabr tarixlərində Bakı yenidən qlobal su gündəminin mərkəzinə çevrildi. 2-ci Beynəlxalq Su Təsərrüfatı Sərgi və Konfransı – “Baku Water Week 2025” Bakı Ekspo Mərkəzində uğurla keçirildi. Tədbir su təsərrüfatı sahəsində ən son texnologiyaları və innovativ həlləri təqdim etməklə, dövlət qurumlarını, beynəlxalq şirkətləri, ekspertləri və peşəkar ziyarətçiləri bir araya topladı.
Bu ilki “Baku Water Week”də Azərbaycanla yanaşı, Almaniya, ABŞ, Avstriya, Belarus, Böyük Britaniya, Çexiya, İsrail, İsveçrə, Hindistan, Macarıstan, Türkiyə, Serbiya, Səudiyyə Ərəbistanı və Sinqapuru təmsil edən 60-dan çox şirkət və nümayəndə heyəti iştirak etdi. Səudiyyə Ərəbistanının enerji və su sahəsində ixtisaslaşmış aparıcı şirkəti “ACWA Power” tədbirin baş sponsoru oldu.
11 sentyabrda keçirilən 2-ci Beynəlxalq Su Təsərrüfatı Konfransı çərçivəsində 10 ölkədən 40 məruzəçi çıxış edərək su ehtiyatlarının idarə edilməsi, rəqəmsallaşma, alternativ mənbələr, su diplomatiyası və innovasiyaların rolu mövzularını müzakirə etdilər. Konfrans zamanı dövlət və özəl qurumlar arasında anlaşma memorandumları imzalandı, o cümlədən ACWA Power ilə Azərbaycan Dövlət Su Ehtiyatları Agentliyi arasında mühüm əməkdaşlıq sənədləri təsdiq olundu.
12 sentyabrda isə 6-cı Xəzər Su İnnovasiya Forumu “AquaLink Azərbaycan”ın təşkilatçılığı ilə baş tutdu. Forumda qabaqcıl texnologiyaların tətbiqi, təkrar emal, ətraf mühitin qorunması və innovativ yanaşmalar mövzuları ətrafında dörd panel müzakirəsi keçirildi.
Üç gün ərzində sərgi pavilyonlarında su təmizlənməsi, irriqasiya sistemləri, duzsuzlaşdırma texnologiyaları, bulud toxum səpmə, süni intellekt və İKT əsaslı idarəetmə həlləri nümayiş etdirildi. Bakı Ekspo Mərkəzinin foyesində “Zabuxçay su anbarı” və “Şiber” su çarxının maketləri, həmçinin “Ümid var” İnklüziv Yaradıcılıq Birliyinin “Baku Water Week 2025 fərqlilərin fırçasında” adlı sərgisi qonaqlara təqdim olundu.
“Baku Water Week 2025” Azərbaycanın su təsərrüfatı sahəsində beynəlxalq tərəfdaşlıqların genişləndirilməsinə, ölkəyə yeni texnologiya və investisiyaların cəlbinə mühüm töhfə verdi. Tədbir bir daha təsdiqlədi ki, Bakı regional deyil, qlobal miqyasda da su ehtiyatlarının idarə olunması və innovasiyalar sahəsində dialoq üçün strateji mərkəzə çevrilib.
Tədbirin təşkilatçıları “Caspian Event Organisers”, “Caspian Event Management” və “ICA Events” şirkətləri, həmçinin Azərbaycan Dövlət Su Ehtiyatları Agentliyi idi. Rəsmi tərəfdaşlar arasında “PAŞA Bank”, “Absheron Hotel Group”, “Hilton Baku”, “Radisson Hotel Baku”, “Ibis Baku City”, “Gloria Flowers”, “Buketeria”, “Greenwich Travel Club” və digər şirkətlər çıxış etdilər.
