Çinin Şanxay şəhərində mühəndislik tarixini yenidən yazacaq layihə həyata keçirilib. Təxminən 7500 metrik ton ağırlığında və 4030 kvadratmetr ərazini əhatə edən tarixi Huayanli bina kompleksi robotların köməyi ilə müvəqqəti olaraq dəyişdirilib ki, altında infrastruktur tikilsin. Tamamlandıqdan sonra bina 19 gün ərzində ilkin yerinə qaytarılıb. Beləliklə, dünyada ilk dəfə yüzlərlə robot şəhərdəki hündürmərtəbəli bir binanın yerini dəyişərək tarixdə yeni səhifə açmağa qadir olub. Layihə bu günə qədər robotların köməyi ilə aparılan ən böyük bina köçürülməsi əməliyyatı kimi qeydə alınıb.
1920-1930-cu illərdə tikilmiş Huayanli kompleksi şəhər orta təbəqəsinin həyat tərzini əks etdirən şikumen memarlığı ilə seçilir. Bu memarlıq Çin həyətlərini Qərb tipli sıra evləri ilə birləşdirir. Ərazinin qorunub saxlanılmasına ehtiyac olduğu üçün bina sökülməkdənsə, müvəqqəti olaraq başqa yerə köçürülüb. Aşağıdakı strukturda 53.000 kvadrat metrlik çoxmərtəbəli ticarət mərkəzi, dayanacaqlar üçün qaraj və metro bağlantısı yerləşəcək. Bu nəhəng strukturun yerdəyişməsinə hər biri təxminən 10 ton yük qaldıra bilən 432 hidravlik “gəzinti” robotu cəlb edilib. Sensorlarla təchiz edilmiş sistem real vaxt rejimində təzyiq, vibrasiya və hizalanma məlumatlarını izləyir, strukturun sabit qalmasını təmin edirdi. Mərkəzi süni intellekt sistemi bütün prosesi idarə edirdi.
Robotlar strukturu gündə təxminən 10 metr sürətlə hərəkət etdirdilər. İlkin yerdəyişmə 2023-cü ilin sonlarında, kompleks yeraltı qazıntı üçün 48 metr qərbə və 46 metr şimala köçürüldükdə başlandı. Daha sonra köçürülmə prosesi 2025-ci il mayın 19-da başladı və bina iyunun 7-də ilkin təməli üzərinə qoyulub. Köçürülmə prosesində təkcə hərəkət edən robotlar deyil, həm də 3D skan texnologiyası, özü idarə olunan qazma robotları, minlərlə metr konveyer sistemləri və torpaq növlərini ayırd edə bilən süni intellekt alqoritmlərindən istifadə edilib. Bu texnologiyalar sayəsində qrunt strukturunun təhlili aparılıb, toqquşma risklərinin qarşısı alınıb, millimetr dəqiqliklə qrunt daşıma marşrutları planlaşdırılıb.
