Artıq texnologiyanın inkişafı ilə insanların biometrik məlumatlarını toplamaq daha da asanlaşıb. Məhz bundan istifadə edən Vyetnam yeni qərar ilə iyul ayına kimi 70 milyon insanın biometrik məlumatlarını toplayaraq onlara nəzarət edəcək. Belə ki, artıq Vyetnamda şəxsiyyəti təsdiqləmək üçün vətəndaşların biometrik məlumatlarının toplanmasına başlanılıb. Baş nazir Pham Minh Chin, ölkənin İctimai Təhlükəsizlik Nazirliyinə göz iris skanı, səs nümunələri və DNT məlumatları kimi ümumi biometrik məlumatları insanlardan toplamaq təlimatını verib. Qeyd edək ki, bu qərar Vyetnamın Milli Şəxsiyyət Qanununda edilən dəyişikliklərə uyğundur.
Vyetnamda ötən il noyabrın 27-də edilən dəyişikliklərlə artıq 14 yaşdan yuxarı olan hər kəsə rəqəmsal şəxsiyyət vəsiqəsi verilir. 6-14 yaşlı vətəndaşların belə kartları almasına hələlik ehtiyac duyulmur. Qanun eyni zamanda digər DNT məlumatları ilə yanaşı qan qrupu məlumatlarının da milli məlumat bazasına daxil edilməsinə şərait yaradır. Beləliklə, toplanan bütün bu məlumatlar müxtəlif dövlət qurumlarının istifadəsinə veriləcək.
Nazirlik identifikasiya sisteminin ümumi milli məlumat bazasına inteqrasiyasını elan edir. Yeni qərarın əsas ideyası isə müxtəlif qurumlar arasında qarşılıqlı əlaqəni bu yolla asanlaşdırmaqdır. Yeni rəqəmsal şəxsiyyət vəsiqəsi gələcəkdə Vyetnamda şəxsiyyət vəsiqələrini, tibbi sığorta kartlarını, sosial təminat kartlarını, sürücülük vəsiqələrini, nikah və doğum şəhadətnamələrini də əvəzləyəcək. Ölkə əhalisinin təqribən 70 milyon nəfər olduğunu nəzərə alsaq, bu məlumatların toplanması onların mütləq şəkildə qorunmasını məcburi edir.
