Hubble Network, çoxlarının qeyri-mümkün hesab etdiyi bir nailiyyət əldə etdi. Belə ki, şirkət tarixldə ilk dəfə olaraq kosmosda olan peyklə Bluetooth əlaqəsi quraraq adını tarixə yazdırıb. Hubble Network tərəfindən həyata keçirilən bu nailiyyət Bluetooth dəstəkləyən istənilən bir cihaz ilə qlobal peyk şəbəkəsi yaratmaq layihəsinin bir parçasıdır. Habelə, şirkətin bu nailiyyəti layihənin reallaşması üçün olduqca mühüm addımdır.
Bu ilin əvvəlində Seattleda yerləşən startap Kaliforniyadakı Vandenberg Kosmik Qüvvələri Bazasından SpaceX-in Transporter-10 missiyasının göyərtəsində ilk iki peykini orbitə çıxarıb. O vaxtdan bəri şirkət 600 km məsafədə 3,5 mm-lik sadə Bluetooth çipindən siqnal qəbul etməyə müvəffəq olub. Şirkətin fikrincə, hər hansı bir Bluetooth cihazını Hubble-ın peyk şəbəkəsinə proqram təminatı yeniləməsi ilə qoşmaq qlobal əhatə dairəsini 20 dəfə az batareya sərfiyyatı və 50 dəfə aşağı əməliyyat xərcləri ilə təmin edə bilər. Beləliklə, mövcud aşağı gücə malik, aşağı qiymətli sensorlarla bahalı kosmik aparatlara ehtiyac olmadan saysız-hesabsız proqramlar inkişaf etdirilə bilər.
Hubble Network artıq istehlakçı cihazları, tikinti, infrastruktur, təchizat zənciri, logistika, neft və qaz və müdafiə kimi müxtəlif sahələrdə pilot müştərilərlə əməkdaşlıq etdiyini bildirir. Qeyd edək ki, şirkət 2021-ci ildə Life360-ın həmtəsisçisi Haro, Iotera qurucusu Ben Wild və aerokosmik mühəndis Con Kim tərəfindən təsis edilib. Bluetooth çipini peykə qoşmaq ideyası ilk dəfə Haroya təqdim olunanda o, bunu mümkünsüz hesab edirdi. Lakin mövcud yerüstü və peyk şəbəkələrinin qeyri-adekvat olması, xüsusilə ucqar ərazilərdə əhatə dairəsi problemləri, həddindən artıq enerji sərfiyyatı və yüksək istismar xərcləri bu ideyanı cəlbedici edib.
