Artıq dünyanın bir çox ölkəsi bərpa olunan enerji mənbələrindən istifadə edir. Belə ki, bu enerjilərə biz külək, günəş enerjilərini aid etsək də, indi daha bir üsul ilə alternativ enerji əldə etmək olar. Bərpa olunan enerjinin davamlılıq problemini həll etmək üçün tədqiqatçılar bildirir ki, süni bitkilər küləyi və yağışı elektrik enerjisinə çevirə bilir.
Ümumiyyətlə bərpa olunan enerjinin əsas çatışmazlıqlarından biri onun bəzi əsas mənbələrinin daim mövcud olmamasıdır. Belə ki, günəş enerjisi üçün lazım olan günəş şüaları gecələr mövcud deyil və ya külək enerjisi üçün lazım olan küləyin sürəti də daim olmur. Tədqiqatçılar bu yaxınlarda iki təbii qüvvədən, külək və yağışdan eyni vaxtda elektrik enerjisi istehsal etməklə bu problemi qismən həll etmək istəyirlər. Bu üsul daha da inkişaf etdirildikdən sonra müəyyən cihazlar üçün daha çevik və daha uzunmüddətli enerji təchizatına da səbəb ola bilər.
Amerika Kimya Cəmiyyətinin (ACS) tədqiqatçıları bu yaxınlarda külək və yağışı elektrik enerjisinə çevirə bilən süni bitkilər haqqında ətraflı məqalə dərc etdilər. Dərc olunan məqalədə bildirilir ki, TENG adlı nanogenerator küləkdən kinetik enerji topladığı halda, onun üzərinə yerləşdirilmiş damcı əsaslı elektrik generatoru DEG yağan yağış damcılarından enerji alır. Optimal şəraitdə TENG qısa müddət ərzində 252 volt və DEG 113 volt enerji istehsal edə bilər. Habelə sınaq zamanı bu cihaz qısa müddət ərzində 10 LED işığını elektrik ilə təmin etməyi bacarıb. Praktik istifadə üçün bu kifayət olmaya bilər, lakin metod daha əhatəli şəbəkə üçün gələcəkdə daha da təkmilləşdirilə bilər.
