Əgər bu vaxta qədər The Line layihəsi ilə tanış olmamısınızsa, Səudiyyə Ərəbistanın həm fantastik, həm məntiqsiz görünən işlərindən xəbərdar deyilsiniz. Səudiyyə Ərəbistanın vəliəhd şahzadəsi Məhəmməd bin Salman Əl Səud, deyilənə görə Misir Piramidalarını kölgədə qoymaq üçün 170 Km uzunluğunda və 488 metr hündürlüyündə 2 bir-birinə paralel binalardan ibarət “The Line” layihəsini artıq çoxdan başladıb. Lakin qarşıdakı 10 illikdə qəribəliyi ilə fərqlənən tək bina The Line olmayacaq. Çünki, indi də 2030-cu ilə qədər tamamlanması gözlənilən, 400 metrlik Mukaab adı verilmiş kub binanın inşası üzərində Səudiyyə Ərəbistan işlər görür.
Müqayisə üçün, ümumi ərazəsi 160 000 m² olan Mukaab daxilinə təqribi 172 ədəd köhnə 5 mərtəbəli tikili yerləşir
Bu layihə də Səudiyyə Ərəbistanın vəliəhd şahzadəsi Məhəmməd bin Salman Əl Səudə məxsus New Murabba Development Company tərəfindən hazırlanır. Layihə başa çatdıqdan sonra Səudiyyə Ərəbistanına ümumilikdə 48 milyard dollara yaxın qeyri-neft sektorundan gəliri qazandırması hədəflənir. Səudiyyə Ərəbistanı İctimai İnvestisiya Fondundan verilən açıqlamaya görə, bu maraqlı göydələnin daxilində muzey, texnologiya və dizayn universiteti, hətta teatr və 80-dən çox əyləncə mərkəzi yer alacaq. Ər-Riyadın yeni mərkəzi olaraq görülən göydələn Riyad hava limanına cəmi 20 dəqiqəlik məsafədə olacaq. Mukaab daxilində isə ikinci bir spiral formalı göydələn yerləşəcək.
Məlumata görə, bu nəhəng binada 100 min yaşayış sahəsi, 9 min mehmanxana otağı, 980 min kvadratmetr mağaza və 1,4 milyon kvadratmetr ofis sahəsi olacaq. Daxilində isə futuristik gələcək atmosferi yaradılması üçün müasir holoqram texnologiyalarından istifadə ediləcək. Qeyd edək ki, bu layihə 170 km uzanan The Line ilə müqayisədə daha kiçik olduğundan inşa edilməsi daha rahat ola bilər. Lakin qarşıdakı 7 il ərzində belə qəribə layihələrin ortaya çıxacağını düşünmək yenə də çox məntiqli görünmür. Hazırlanmış reklam videosunda isə, sanki layihə 400 metrdən daha kiçik təsvir olunub.
