Honq Konq Politexnik Universitetinin tədqiqat qrupu şəffaf üzvi günəş panelləri (ST-OPV) üçün fotoaktiv materialların potensialını qiymətləndirmək üçün FoMLUE adlı innovativ parametr hazırlayıb. Bu iş texnologiyanın genişmiqyaslı kommersiyalaşdırılması üçün yol aça biləcək əhəmiyyətli bir addım hesab olunur.
Pəncərələrə, ekranlara və müxtəlif səthlərə inteqrasiya edilə bilən şəffaf günəş batareyaları bərpa olunan enerji sektorunu dəyişdirmək potensialına malikdir. Bununla belə, bu texnologiya hələ də bir sıra çətinliklərlə üzləşir, bunlardan ən başlıcası şəffaflıq və enerji səmərəliliyi arasındakı tarazlıqdır. Həm yüksək enerji istehsalı, həm də estetik baxımdan xoş görünüş təklif edən şəffaf üzvi fotovoltaiklər (ST-OPV) son illərdə xeyli elmi maraq doğurub. Unikal işığı udma xüsusiyyətləri, aşağı istehsal xərcləri və ekoloji cəhətdən təmiz strukturu sayəsində ST-OPV-lər binaya inteqrasiya olunmuş günəş enerjisi sistemləri sahəsində güclü inkişaf potensialına malikdir.
Bu potensialı tam şəkildə həyata keçirmək üçün tədqiqatçılar müxtəlif material kombinasiyalarını birləşdirərək və qabaqcıl cihaz mühəndisliyi texnikalarından istifadə edərək ST-OPV-lərin səmərəliliyini və dayanıqlığını artırdılar. Həmçinin, məhsulun rənginin günəş işığı altında təbii görünməsini təmin edərək, fotovoltaik sistemin binanın vizual cəlbediciliyinə xələl gətirməməsini təmin ediblər. Honkonq Politexnik Universitetinin Elektrik və Elektron Mühəndisliyi kafedrasından professor Li Qanq və doktor Yu Cianşenqin rəhbərlik etdiyi bir qrup, ənənəvi fotoaktiv materialları qiymətləndirmək üçün ölçüsüz parametr olan FoMLUE hazırlayıblar. FoMLUE, normallaşdırılmış udma məlumatlarına əsaslanaraq materialların orta vizual keçiriciliyini, zolaq boşluğunu və cərəyan sıxlığını qiymətləndirir və bu da yarı şəffaf günəş batareyaları üçün ən uyğun material kombinasiyalarını təyin etməyə imkan verir.
Tədqiqat göstərdi ki, ən yüksək FoMLUE dəyərlərinə malik üçlü materiallarla istehsal olunan ST-OPV-lər digər modellərlə müqayisədə daha yaxşı istilik izolyasiyası və əməliyyat sabitliyi nümayiş etdirib və həmçinin rekord dərəcədə 6,05% işıq istifadə səmərəliliyinə nail olublar. Bu dəyərin indiyə qədər bildirilən ən yüksək göstərici olduğu bildirilir. Komanda həmçinin ST-OPV-lərin işində coğrafi şəraitin rolunu araşdırdı. Bu məqsədlə, ST-OPV ilə örtülmüş pəncərələrin enerji istehsalına və binaların isitmə/soyutma yüklərinə təsirini təhlil edən keçici simulyasiya modeli hazırlanmışdır. Bu model Çinin 371 şəhərinə tətbiq edilmişdir və onların 90%-dən çoxunda illik enerji istehlakının azaldığı aşkar edilmişdir. Xüsusilə isti yay və mülayim qışı olan bölgələr ST-OPV şüşələrinin quraşdırılması üçün ən uyğun yerlər kimi seçilmişdir. Müəyyən edilmişdir ki, bu ərazilərdə illik enerji qənaəti kvadrat metrə 1,43 GJ-ə çata bilər. Tədqiqat qrupu ST-OPV-lərin uzunmüddətli davamlılığını artırmağı və texnologiyanı geniş ərazili günəş modullarına tətbiq etməyi hədəfləyir. Bu addımların hər ikisi texnologiyanın kommersiya məqsədli istifadəyə keçidi üçün əsas hesab olunur.
