Rusiya Xarkov vilayətində hücuma başlamazdan bir müddət əvvəl Ukrayna silahlı qüvvələrinin rabitə, kəşfiyyat və pilotsuz təyyarələri üçün geniş istifadə etdiyi Starlink peyk xidmətinin fəaliyyətini dayandırıb. Bu barədə “New York Times” Ukrayna hərbçilərinə və rəsmilərinə istinadən məlumat yayıb. Nəşrin yazdığına görə, Elon Musk-ın rəhbəri olduğu Starlink şirkətinin peykləri Rusiya ilə müharibənin ilk günlərindən Ukrayna ordusu üçün kritik əhəmiyyətə malikdir. Məhz bu səbəbdən də Rusiya yeni silahları ilə Elon Musk-ın peyklərinə hücum edərək onların fəaliyyətini dayandırıb.
Bildirilib ki, bu ay Rusiya qoşunları Ukraynanın şimal sərhədini keçməmişdən bir müddət əvvəl Ukrayna Silahlı Qüvvələrinin 92-ci Hücum Briqadasının əsgərlərinin istifadə etdiyi Starlink siqnalına müdaxilə ediblər. Ukrayna hərbçilərinin fikrincə, bu, onların əlaqədə olmasına mane olub və mətn mesajlaşmasına keçməyə məcbur edib. Ukrayna rəsmiləri, Rusiya Starlink sistemini sıradan çıxarmaq üçün daha güclü elektron müharibə sistemləri və daha təkmil alətlərdən istifadə etdiyini bəyan ediblər.
Qeyd edək ki, bu hadisə Rusların Starlink-in geniş şəkildə fəaliyyətini dayandırmasına səbəb olan ilk hücümu kimi qeydə alınıb. Yeni baş verən bu hadisə Ukraynanın taktiki dəyişiklik etməsini zəruri edib. Ukrayna innovasiya, inkişaf, elm və texnologiya üzrə məsul şəxs Mikhailo Fedorov bu həftə verdiyi müsahibədə Rusiyanın Starlink-ə son hücumu üçün yəqin ki, bir az daha təkmil texnologiyadan istifadə etdiyini bildirib. Hazırda Starlink peyklərinin sıradan çıxarılması müharibədə olduqca həlledici rol oynayır deyə bilərik.
